ពលរដ្ឋ២១៦គ្រួសាររងគ្រោះដោយជំនន់ទឹកភ្លៀងនៅស្រុកមង្គលបូរី ទទួលបានអំណោយសង្គ្រោះបន្ទាន់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន
ខេត្ដបន្ទាយមានជ័យ៖ ពលរដ្ឋដែលរងគ្រោះដោយជំនន់ទឹកភ្លៀងចំនួន២១៦ គ្រួសារ នៅឃុំបត់ត្រង់ នៃស្រុកមង្គលបូរី ខេត្តបន្ទាយមានជ័យ ទទួលបានអំណោយស្បៀងអាហារសង្គ្រោះបន្ទាន់ មានជាគ្រឿងឧបភោគបរិភោគរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាឆ្លើយតបបន្ទាន់ក្នុងដំណាក់កាលគ្រោះទឹកជំនន់នេះសម្រាប់ជួយទ្រទ្រង់ដល់ជីវភាពគ្រួសារបងប្អូនដែលកំពុងជួបការលំបាកបានមួយគ្រា។
អំណោយសប្បុរសធម៌ទាំងនេះ ត្រូវបានឯកឧត្តម អ៊ុំ រាត្រីអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ រួមជាមួយក្រុមការងារចុះទៅចែកដល់ប្រជាពលរដ្ឋរងគ្រោះ ដែលត្រូវបានអាជ្ញាធរកងកម្លាំងប្រដាប់អាវុធជន្លៀសមកកាន់ទីទួលសុវត្ថិភាព នៅព្រឹកថ្ងៃទី១៥ ខែតុលា ឆ្នាំ២០២០ ដោយក្នុងមួយគ្រួសារៗ ទទួលបានអង្ករ ៣០គីឡូក្រាម មី១កេស ត្រីខ១០កំប៉ុង ទឹកស៊ីអ៊ីវ១យួរ។
ក្នុងនាមប្រធានគណៈកម្មាធិការសាខាកាកបាទក្រហមខេត្ត ឯកឧត្តមអ៊ុំ រាត្រី បានថ្លែងជូនដល់ប្រជាពលរដ្ឋនូវការផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ដែលសម្ដេចតែងតែគិតគូរពីសុខទុក្ខជីវភាពរស់នៅរបស់ប្រជាពលរដ្ឋក្រីក្រ ឬជួបការលំបាកនៅគ្រប់ទីកន្លែងទាំងអស់។ ឯកឧត្ដមបានលើកឡើងថា នៅទីណាឱ្យតែមានប្រជាពលរដ្ឋរងគ្រោះងាយរងគ្រោះ ទីនោះតែងតែមានវត្តមានកាកបាទក្រហមកម្ពុជាមកជួយសង្គ្រោះជានិច្ច។ ជាក់ស្តែងដូចជាក្រុមការងារកាកបាទក្រហមរួមនឹងអាជ្ញាធរកងកម្លាំងប្រដាប់អាវុធដែលកំពុងធ្វើសកម្មភាពជួយដល់ប្រជាពលរដ្ឋរងគ្រោះដោយជំនន់ទឹកភ្លៀងនាពេលនេះ ដោយមិនប្រកាន់ពូជសាសន៍ ពណ៌សម្បុរឬនិន្នាការនយោបាយឡើយដែលស្ថិតក្រោមការដឹកនាំរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា។
ឯកឧត្តមអភិបាលខេត្ដក៏ដូចជាបងប្អូនប្រជាពលរដ្ឋបានថ្លែងអំណរគុណយ៉ាងជ្រាលជ្រៅបំផុត ជូនចំពោះសម្ដេចទាំងពីរ ដែលបានយកចិត្តទុកដាក់ជួយដល់ពួកគាត់កំពុងជួបបញ្ហាខ្វះខាត ដោយសារជំនន់ទឹកភ្លៀង នៅក្នុងជីវភាពរស់នៅប្រចាំថ្ងៃនេះបានទាន់ពេលវេលា។
យោងរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យឱ្យដឹងថា ជំនន់ទឹកភ្លៀងនៅខេត្តបន្ទាយមានជ័យគិតត្រឹមថ្ងៃទី១៤ខែតុលានេះផលប៉ះពាល់លើ៩ក្រុង ស្រុក ៣៧ឃុំ សង្កាត់បណ្តាលឱ្យលិចលង់ទឹកមនុស្សស្លាប់០៦នាក់ប៉ះពាល់លំនៅឋានសរុបចំនួន ៨៥៣៥ខ្នង មនុស្ស ៣៤ ៧១៣នាក់ និងបានជន្លៀសទៅទីទួលសុវត្ថិភាពចំនួន ១ ៤៧៣គ្រួសារ មានមនុស្ស ៥ ៦២៦នាក់ លិចស្រែចំនួន១១ ១៨៨ហិកតា ដំឡូងមី ១ ៩០៤ហិកតា និងដំណាំរួមផ្សំ ៤១៩ហិកតា សាលារៀន ៥២កន្លែង ត្រូវផ្អាកការសិក្សាមណ្ឌលសុខភាព ៦កន្លែង វត្ត ២៥ សាលាឃុំ២ ផ្លូវ ៣៦៨កន្លែង (ប្រវែង ២០០ ៨៨៧ ម៉ែត្រ)៕ by AKP
