កម្លាំងអធិការនគរបាលក្រុងប៉ោយប៉ែត បំបែកសម្បុកចោរកម្ម ចាប់ខ្លួនបាន ៦នាក់ បញ្ជូនទៅតុលាកា
ខេត្តបន្ទាយមានជ័យ៖ នៅរសៀលថ្ងៃអាទិត្យ ៦រោច ខែមិគសិរ ឆ្នាំជូតទោស័ក ពុទ្ធសករាជ២៥៦៤ ត្រូវនឹងថ្ងៃទី៦ ខែធ្នូ ឆ្នាំ២០២០នេះ អធិការនគរបាលក្រុងប៉ោយប៉ែត បានបង្ហាញមុខសញ្ញាជនសង្ស័យ ដែលតែងតែធ្វើសកម្មភាព ចោរកម្ម ក្នុងក្រុងប៉ោយប៉ែត ដកហូតម៉ូតូបានចំនួន ៥គ្រឿង និងប្រគល់ ម៉ូតូចំនួន ៣គ្រឿង ទៅម្ចាស់ដើម្បី វិញ ២គ្រឿងទៀត កំពុងស្វែងរកម្ចាស់ ។
សូមបញ្ជាក់ថា កាលពីថ្ងៃទី០៤ ខែធ្នូ ឆ្នាំ២០២០ កម្លាំងជំនាញក្រុងប៉ោយប៉ែតបានទទួលបណ្តឹងពីឈ្មោះ គឹម ណាវី ភេទស្ រីអាយុ៣៧ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យថា ខ្លួនបានបាត់ម៉ូតូមួយគ្រឿងម៉ាកស៊ូមមេីរអិច ព៍ណស-ក្រហម ស្លាកលេខ បន្ទាយមានជ័យ 1T-៨៤៥៥ នៅចំណុចភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត រួមជាមួយបណ្តឹង របស់លោក សំ សុជា ភេទប្រុស អាយុ២៧ឆ្នាំ បានបាត់ម៉ូតូហុងដាទ្រីម ព៌ណខ្មៅ ស្លាកលេខ បន្ទាយមានជ័យ ១N-១៨៨៤ កាលពីថ្ងៃទី៣០ ខែវិច្ឆិកា ឆ្នាំ២០២០ តាមបណ្តឹងរបស់ឈ្មោះ ហាក់ ឆ័ងហ៊ុយ ភេទប្រុស អាយុ២៣ឆ្នាំ ជនជាតិខ្មែរ បាត់ម៉ូតូម៉ាកវេវពណ៌ខ្មៅ បិតស្កុតព៍ណទឹកបិច ។
ដោយមានការយកចិត្តទុកដាក់ ពីលោក ឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្រួបសម្រួល ពី ព្រះរាជអាជ្ញា ខេត្តបន្ទាយមានជ័យ។
លោកឧត្តមសេនីយ៍ត្រី នូ ជីវ័ន្ត ដឹកនាំជំនាញព្រហ្មទណ្ឌ និងជំនាញក្រុងប៉ោយប៉ែត ក្រោមការដឹកនាំដោយលោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានចុះធ្វើការស្រាវជ្រាវឈានដល់ឃាត់ខ្លួនជាបន្តបន្ទាប់ ហើយជនសង្ស័យដែល ពាក់ព័ន្ធក្នុងករណីលួចម៉ូតូខាងលើ រួមមាន ៖
១ • ឈ្មោះ រឿន ពិសិទ្ធ ភេទប្រុស អាយុ២៥ឆ្នាំ មានទីលំនៅភូមិបាលិ លេយ្យ១ សង្កាត់ប៉ោយប៉ែត ក្រុងប៉ោយប៉ែត ជាអ្នករកទីផ្សារលក់ម៉ូតូដែលបក្ខពួកឈ្មោះ ម៉ៅ មករា លួចបាន ទៅអោយ ហេង ចាន់ថា ។
២ • ឈ្មោះ ម៉ៅ មករា ហៅអារាមីន ភេទប្រុស អាយុ១៦ឆ្នាំ មានទីលំនៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ជាជនដៃដល់កាច់សោរកម៉ូតូយ៉ាងសកម្ម។
៣• ឈ្មោះ តឿន ពាង ហៅមុឹន ហៅរើន ភេទប្រុស អាយុ១៦ឆ្នាំ មានទីលំនៅភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត ជាបក្ខពួកជាមួយ ម៉ៅ មករា ។
៤• ឈ្មោះ កាន រ៉ង ភេទប្រុស អាយុ១៦ឆ្នាំ មានទីលំនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ជាបក្ខពួករបស់ ម៉ៅ មករា ត្រូវបានឃាត់ខ្លួននៅថ្ងៃទី០៤ ខែធ្នូ ឆ្នាំ២០២០ នៅក្រុងប៉ោយប៉ែត ។
៥ ឈ្មោះ ហេង ចាន់ថា ភេទប្រុស អាយុ២៨ឆ្នាំ មានទីលំនៅ ភូមិប៉ោយតាសេក ឃុំបឹងព្រីង ស្រុកថ្មគោល ខេត្តបាត់ដំបង ជាអ្នកទទួលទិញម៉ូតូដែលលួចបាន។
៦• ឈ្មោះ វឿ សូវៀត ភេទប្រុស អាយុ២៦ឆ្នាំ មានទីនៅភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង ជាជាងជួសជុលម៉ូតូ នឹងកែឆ្នៃ ឃាត់បាននៅវត្តបឹងត្រាវ ថ្ងៃទី០៥ ខែធ្នូ ឆ្នាំ២០២០ ។
ចំពោះម៉ូតូដែលបានដាក់បណ្តឹងចំនួន ៣គ្រឿងខាងលើ សមត្ថកិច្ច បានស្រាវជ្រាវដកហូតបាននៅបឹងព្រីង ថ្មគោល ១គ្រឿង ម៉ាកវេវពណ៌ខ្មៅ បិតស្កុតព៍ណទឹកបិច និងនៅឃុំភ្នំធំ ម៉ូតូ ២គ្រឿង ម៉ាកស៊ូម័រពណ៌ស និងម៉ាកហុងដាឌ្រីម ពណ៌ខ្មៅ ហើយប្រគល់ជូនទៅម្ចាស់វិញ ចំណែក ២គ្រឿងទៀត កំពុងស្វែងរកម្ចាស់។
ចំពោះជនសង្ស័យទាំង ៦នាក់ បច្ចុប្បន្ន ឃាត់ខ្លួនអនុវត្តតាមនិតិវិធីផ្លូវច្បាប់ ជាចុងបញ្ចប់ លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត ស្នើរសុំដល់បងប្អូនប្រជាពលរដ្ឋ យកចិត្តទុកដាក់ថែរក្សាវត្ថុមានតម្លៃ ជាពិសេស ម្ចាស់ផ្ទះសំណាក់ ផ្ទះជួល បន្ទប់ជួល សូមមេត្តា ដាក់កាំមេរ៉ាសុវត្ថិភាព ងាយស្រួលពេលមានបញ្ហា សមត្ថកិច្ចងាយកំណត់មុខសញ្ញាជនសង្ស័យបានឆាប់រហ័ស ៕
