លោក ម៉ាង ស៊ីណេត អញ្ជើញបិទវគ្គបណ្តុះបណ្តាលបច្ចេកទេស ស្តីពីការដំឡើងប្រព័ន្ធអំពូលសូឡាបំភ្លឺផ្លូវ សូឡា PV និងម៉ូតូអាគុយ
ខេត្តព្រះសីហនុ៖ លោក ម៉ាង ស៊ីណេត អភិបាលរងខេត្តព្រះសីហនុ បានអញ្ជើញចូលរួមបិទវគ្គបណ្តុះបណ្តាលបច្ចេកទេស ស្តីពីការដំឡើងអំពូលសូឡាបំភ្លឺផ្លូវ សូឡា PV និងម៉ូតូអាគុយ នៅសាលាខេត្តព្រះសីហនុ ដែលមានសិក្ខាកាមមកពីក្រុង ស្រុកទាំង ៥ សរុបចំនួន ២០នាក់ នារសៀលថ្ងៃ៩កើត ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃពុធ ទី២៣ ខែធ្នូ ឆ្នាំ២០២០ ។
លោក អ៊ុយ កាម៉ាល អគ្គនាយករង នៃអគ្គនាយកដ្ឋានចំណេះដឹង និងព័ត៌មានបរិស្ថាននៃក្រសួងបរិស្ថាន មានប្រសាសន៍ថា វគ្គបណ្តុះបណ្តាលបច្ចេកទេស ស្តីពីការដំឡើងអំពូលសូឡាបំភ្លឺផ្លូវ សូឡា PV និងម៉ូតូអាគុយ រយ:ពេល២ថ្ងៃ គឺថ្ងៃទី២២ដល់២៣ ខែធ្នូ ឆ្នាំ២០២០ ត្រូវបានបញ្ចប់ទទួលបានលទ្ធផលល្អ ដោយមានការធ្វើបទបង្ហាញពីគ្រូបង្គោលប្រទេសចិន លើទ្រឹស្តី និងការអនុវត្តជាក់ស្តែង ក្នុងការដំឡើងអំពូលសូឡាបំភ្លឺផ្លូវ សូឡា PV និងម៉ូតូអាគុយទទួលបានលទ្ធផលល្អតាមការគ្រោងទុក ។
លោក ម៉ាង ស៊ីណេត អភិបាល រងខេត្តព្រះសីហនុ បានថ្លែងអំណរគុណក្រសួងបរិស្ថាន និងគ្រូបង្គោលមកពីប្រទេសចិន ដែលបានជួយបង្ហាត់បង្រៀនដល់មន្ត្រី បច្ចេកទេសក្រុង ស្រុកទាំង៥ របស់ខេត្តព្រះសីហនុ ពិសេសការខិតខំប្រឹងប្រែងស្តាប់ និងការអនុវត្តជាក់ស្តែងទទួលបាននូវចំណេះដឹងថ្មីៗបន្ថែមទៀតសម្រាប់យកទៅធ្វើការតំឡើងនៅតាមសាលានានាក្នុងខេត្តព្រះសីហនុនាពេលខាងមុខ ។
លោកអភិបាលរងខេត្ត បានបន្តថា ដោយសារប្រទេសជាតិមានសុខសន្តិភាព មានការអភិវឌ្ឍរីកចម្រើន ធ្វើឱ្យជីវភាពរបស់ប្រជាពលរដ្ឋកាន់តែល្អប្រសើរ កាត់បន្ថយនូវភាពក្រីក្រ ។ រាជរដ្ឋាភិបាលកម្ពុជា មានចក្ខុវិស័យនៅឆ្នាំ២០៣០ ជំរុញប្រទេសកម្ពុជា ជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់ ។ ខេត្តព្រះសីហនុ បានធ្វើការអភិវឌ្ឍហេដ្ឋារចនាសម្ព័ន្ធផ្លូវ ៣៤ខ្សែ ដែលសាងសង់ដោយក្រុមហ៊ុនខ្មែ “ខ្មែរធ្វើបាន” នេះជាសមត្ថភាពរបស់ខ្មែរ ដែលបានសាងសង់ផ្លូវ ៣៤ខ្សែ ប្រកបដោយគុណភាព និងសោភណភាព អនុវត្តដោយខ្លួនឯង ។ ប្រមុខរាជរដ្ឋាភិបាលបន្តសាងសង់ផ្លូវ ៣៨ខ្សែបន្តទៀត នៅខេត្តសៀមរាប ដើម្បីបម្រើឱ្យវិស័យទេសចរណ៍ និងការធ្វើដំណើររបស់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ។
លោកបញ្ជាក់ថា ខេត្តព្រះសីហនុ មានផ្លូវគោក ផ្លូវដែកតភ្ជាប់ទៅកាន់រាជធានីភ្នំពេញ និងបណ្តាខេត្តមួយចំនួនទៀត មានកំពង់ផែសមុទ្រទឹកជ្រៅ មានទំនិញឆ្លងកាត់ ៧០ភាពរយ មានព្រលានយន្តហោះអន្តរជាតិ មានឆ្នេរសមុទ្រសរស្អាត ខ្យល់អាកាសបរិសុទ្ធ និងមានកោះចំនួន ៣២ ប្រកបដោយសក្តានុពលខាងវិស័យទេសចរណ៍ ធ្វើឱ្យខេត្តព្រះសីហនុ មានការអភិ វឌ្ឍរីកចម្រើនយ៉ាងឆាប់រហ័សនាពេលបច្ចុប្បន្ន ៕ by AKP
