ម៉ាស់ចំនួន ៣០ ០០០ម៉ាស់ និងជែលចំនួន ២ ០០០ដប របស់ក្រុមហ៊ុនគ្រួសារកក់ក្ដៅ តយ្រូវបានប្រគល់ជូនឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ
នៅព្រឹកថ្ងៃព្រហស្បតិ៍ ១០កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែធ្នូ ឆ្នាំ២០២០ នៅទីស្ដីការក្រសួង ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានអនុញ្ញាតឲ្យលោកឧកញ៉ា អ៊ុច សម្បត្តិ ស្ថាបនិកក្រុមហ៊ុនគ្រួសារកក់ក្ដៅ និងភរិយា ព្រមទាំងសហការី ចូលជួបសម្ដែងការគួរសម និងធ្វើការប្រគល់ និងទទួលម៉ាសចំនួន ៣០ ០០០ម៉ាស់ និងជែលចំនួន ២ ០០០ដប ដែលជាអំណោយរបស់ក្រុមហ៊ុនគ្រួសារកក់ក្ដៅ សម្រាប់ចែកជូនមន្រ្ដីរាជការក្រសួងអភិវឌ្ឍន៍ជនបទ រួមចំណែកទប់ស្កាត់ការរីករាលដាលជំងឺកូវីដ ១៩ ។
ក្នុងជំនួបនេះឯកឧត្តមបណ្ឌិតសភាចារ្យ អ៊ុក រ៉ាប៊ុន បានមានប្រសាសន៍ថា ក្រសួងអភិវឌ្ឍន៍ជនបទមានតួនាទី និងភារកិច្ចធ្វើឲ្យប្រសើរឡើងនូវជីវភាពរស់នៅរបស់ប្រជាពលរដ្ឋនៅតំបន់ជនបទ ធ្វើយ៉ាងណាបង្ខិតគម្លាតរវាងអ្នករស់នៅទីក្រុង និងអ្នករស់នៅតំបន់ជនបទ។
បេសកកម្មរបស់ក្រសួងអភិវឌ្ឍន៍ជនបទគឺរួមចំណែកកាត់បន្ថយភាពក្រីក្ររបស់ប្រជាពលរដ្ឋ ដោយផ្ដោតទៅលើការកសាងហេដ្ឋារចនាសម្ព័ន្ធ គមនាគមន៍ ដែលបច្ចុប្បន្នរាជរដ្ឋាភិបាលក៏ដូចជាក្រសួងអភិវឌ្ឍន៍ជនបទ បាននឹងកំពុងធ្វើការកែលម្អជាបណ្ដើរៗ ពីផ្លូវជនបទក្រាលក្រួសក្រហមឲ្យទៅជាផ្លូវក្រាលកៅស៊ូពីរជាន់ប្រភេទ DBST និងផ្លូវបេតុងដើម្បីធានាដល់ការប្រើប្រាស់បានយូរអង្វែង។ជាមួយនេះក្រសួងមានភារកិច្ចមួយទៀតគឺថែទាំសុខភាពជូនប្រជាពលរដ្ឋនៅជនទ ដែលកំពុងធ្វើសកម្មភាពចំនួនពីរ គឺការងារសម្អាត និងអនាម័យជនបទ ដែលការងារទាំងពីរនេះត្រូវផ្សារភ្ជាប់ទៅនឹងវិស័យផ្គត់ផ្គង់ទឹក ដែលរាជរដ្ឋាភិបាលបានកណត់ថា នៅឆ្នាំ២០២៥ ប្រជាពលរដ្ឋនៅជនបទត្រូវមានទឹកស្អាតប្រើប្រាស់គ្រប់គ្រាន់។
លោកឧកញ៉ា អ៊ុច សម្បត្តិ បានជម្រាបជូនឯកឧត្តមបណ្ឌិតសភាចារ្យ អ៊ុក រ៉ាប៊ុន ថា កន្លងមកក្រុមហ៊ុនគ្រួសារកក់ក្ដៅ បានផ្ដល់ជូនម៉ាស់ចំនួន ៥ម៉ីន ម៉ាស់ដល់រាជរដ្ឋាភិបាលផងដែរ ហ់យក៏បានរួមចំណែកជាមួយរាជរដ្ឋាភិបាលក្នុងការទិញវ៉ាក់សាំងការពាជំងឺកូវីដ ១៩ ចំនួន ១ម៉ឺនដុល្លារ ។ ជាមួយនេះក្រុមហ៊ុនរបស់លោកក៏បានជួយដល់ប្រជាពលរដ្ឋដែលរងផលប៉ះពាល់ដោយសារទឹកជំនន់បានមួយចំនួនធំ នៅខេត្តកំពង់ស្ពឺ ពោធិសាត់ និងខេត្តកំពង់ឆ្នាំងផងដែរ។
ឯកឧត្តមបណ្ឌិតសភាចារ្យរដ្ឋមន្រ្ដី បានថែ្លងអំណរគុណយ៉ាងជ្រាលជ្រៅជូនចំពោះ ក្រុមហ៊ុនគ្រួសារកក់ក្ដៅ ដែលបានផ្ដល់ម៉ាស់ និងជែល ដល់ក្រសួងអភិវឌ្ឍន៍ជនបទ ជាការរួមចំណែកជាមួយរាជរដ្ឋាភិបាលក្នុងការទប់ស្កាត់ការរីករាលដាលជំងឺកូវីដ ១៩ ៕
