លោក Trump ទទួលស្គាល់ការផ្ទេរអំណាចឲ្យលោក Biden
បរទេស៖ ប្រធានាធិបតីសហរដ្ឋអាមេរិកលោក Donald Trump បានទទួលស្គាល់ជាលើកដំបូងអំពីការចាញ់ឆ្នោតរបស់លោក នៅក្នុងការបោះឆ្នោតប្រធានាធិបតីដែលបានធ្វើឡើងកាលពីថ្ងៃទី ៣ ខែវិច្ឆកា។ លោកបានប្រកាសថា នឹងមាន«ការផ្ទេរអំណាចដោយមានរបៀបរៀបរយត្រឹមត្រូវ» នៅថ្ងៃទី២០ ខែមករាខាងមុខនេះ។
នៅក្នុងសេចក្តីថ្លែងការណ៍មួយដែលបង្ហោះនៅលើបណ្តាញ Twitter លោកប្រធានាធិបតី Trump បានថ្លែងថា៖ «ទោះបីជាខ្ញុំមិនយល់ស្របទាំងស្រុងនឹងលទ្ធផលនៃការបោះឆ្នោត និងការចាកចេញ[ពីតំណែង]របស់ខ្ញុំក្តី នឹងមានការផ្ទេរអំណាចដោយសន្តិវិធី នៅថ្ងៃទី២០ ខែមករា»។
លោក Trump បានប្រកាសដូច្នេះ បន្ទាប់ពីសភាទាំងពីរថ្នាក់បានសម្រេចទទួលស្គាល់ជាផ្លូវការលើការបោះឆ្នោតរបស់អង្គបោះឆ្នោតលើជ័យជម្នះរបស់លោកប្រធានាធិបតីជាប់ឆ្នោត Joe Biden កាលពីយប់ថ្ងៃពុធ ក្រោយពីក្រុមបាតុករដែលគាំទ្រលោក Trump រាប់ពាន់នាក់ បានហមព័ទ្ធ និងសម្រុកចូលក្នុងវិមានសភាសហរដ្ឋអាមេរិក៕ ប្រភព៖ ទីភ្នាក់ងារសារព័ត៌មាន AP by VOA
