ពិតជាសាហាវ ! ឃាតករលបឡើងលើផ្ទះ អារ ក សម្លាប់ស្ត្រីមេម៉ាយម្នាក់ បន្សល់ទុកកូនតូចៗ ៣នាក់ ឲ្យនៅកំព្រា
ខេត្តកំពង់ឆ្នាំង៖ ស្ត្រីមេម៉ាយម្នាក់ ត្រូវបានឃាតក អារ ក សម្លាប់ នៅលើផ្ទះ បណ្ដាលឱ្យកូនតូចៗ ៣នាក់ របស់ស្ត្រីរងគ្រោះនោះកំព្រា ដែលហេតុការណ៍នេះ បានកើតឡើង នៅវេលាម៉ោង១ រំលងអធ្រាត្រ ឈានចូលថ្ងៃទី២៥ ខែមករា ឆ្នាំ២០២១ នៅភូមិស្រែអុក ឃុំតាំងក្រសាំង ស្រុកទឹកផុស ខេត្តកំពង់ឆ្នាំង ។
លោកវរៈសេនីយ៍ឯក ខេម វិបុល អធិការនគរបាលស្រុកទឹកផុស បានឲ្យដឹងនៅរសៀល ថ្ងៃទី២៥ ខែមករា ឆ្នាំ២០២១នេះថា៖ ស្ត្រីរងគ្រោះ មានឈ្មោះ អឿន ណេន អាយុ៣៥ឆ្នាំ ជាស្ត្រីមេម៉ាយ កូន ៣នាក់ នៅក្នុងបន្ទុក រស់នៅក្នុងភូមិឃុំស្រុក កើតហេតុខាងលើ។
លោកវរៈសេនីយ៍ឯក ខេម វិបុល បានបញ្ជាក់ថាៈ ជនដៃដល់ ក្នុងករណីឃាតកម្ម ខាងលើនេះ គេបានស្គាល់អត្តសញ្ញាណហើយ ។ ក្រោយពេលកើតហេតុ ជនដៃដល់ ជាឃាតក បានរត់គេចខ្លួនបាត់ ដោយទុកចោលសាកសពស្ត្រីរងគ្រោះ នៅក្នុងថ្លុកឈាម ។ តាមការសន្និដ្ឋាន ជំហានដំបូង សមត្ថកិច្ច បានដាក់ការសង្ស័យ ទៅលើករណីប្រច័ណ្ឌ ទៅលើស្ត្រីរងគ្រោះខាងលើ ។
ករណីឃាតកម្មនេះ សមត្ថកិច្ច កំពុងបើកការស្រាវជ្រាវបន្ទាន់ តាមចាប់ខ្លួនជនដៃដល់ យកមកផ្តន្ទាទោស តាមច្បាប់ ៕
