ដំណឹងល្អ ក្រសួងសុខាភិបាលប្រកាសពីការពុំរកឃេីញករណីជំងឺកូវីដ-១៩ នាំចូលថ្មីទេ និងមានជាសះស្បេីយ ១នាក់
ថ្ងៃនេះកម្ពុជានៅសល់អ្នកជំងឺកូវីដ១៩ ចំនួនតែ ៩នាក់ប៉ុណ្ណោះ ដែលកំពុងសម្រាកព្យាបាលក្នុងមន្ទីរពេទ្យ បន្ទាប់ពីអ្នកជំងឺម្នាក់ត្រូវបានព្យាបាលជាសះស្បើយ ខណៈអ្នកស្ម័គ្រចិត្តចាក់វ៉ាក់សាំងការពារជំងឺកូវីដ១៩ ស៊ីណូហ្វាម មានចំនួនជាង ៣ពាន់នាក់។ តាមការជូនព័ត៌មានរបស់ក្រសួងសុខាភិបាល បានឲ្យដឹងថា នៅព្រឹកថ្ងៃទី១៧ ខែកុម្ភៈ ឆ្នាំ២០២១នេះ អ្នកជំងឺម្នាក់ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យបង្អែក ខេត្តបន្ទាយមានជ័យ គឺជាស្ត្រីជនជាតិខ្មែរ អាយុ៤០ឆ្នាំ ស្នាក់នៅភូមិព្រៃតាប ឃុំរោងគោ ស្រុកក្រឡាញ់ ខេត្តសៀមរាប ធ្វើដំណើរមកពីប្រទេសថៃ មកដល់កម្ពុជា នៅថ្ងៃទី២៧ ខែមករា ឆ្នាំ២០២១ និង មិនមានករណីអ្នកឆ្លងជំងឺកូវីដ១៩ ថ្មីនោះទេ ដូច្នេះគិតទាំងថ្ងៃនេះ គឺមានរយៈពេល ៥ថ្ងៃជាប់គ្នាហើយ ដែលករណីជំងឺកូវីដ១៩ មិនត្រូវបានរកឃើញនៅក្នុងប្រទេសកម្ពុជា។ សូមបញ្ជាក់ថា គិតត្រឹមម៉ោង៧ព្រឹក ថ្ងៃទី១៧ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ៤៧៩នាក់ ក្នុងនោះអ្នកជាសះស្បើយចំនួន ៤៧០នាក់ និងអ្នកជំងឺ ៩នាក់ កំពុងសម្រាកព្យាបាលនៅមន្ទីរពេទ្យ។
ជំងឺកូវីដ-១៩ នៅតែបន្តគម្រាមកំហែងយេីងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបេីមិនចាំបាច់ ព្រោះប្រទេសយេីងកំពុងរាត្បាតក្នុងសហគមន៍ និងប្រទេសជិតខាងយេីងនិងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡេីយ និងត្រូវបន្តគម្លាតបុគ្គលបន្តទៀត ដូចជាអង្គុយគម្លាតពីគ្នា ឈររងចាំគម្លាតពីគ្នា ឈរជជែកគ្នាគម្លាតពីគ្នា ហើយត្រូវបន្តពាក់ម៉ាស់ជាប់ជានិច្ច និងឧស្សាហ៍លាងដៃជាមួយសាប៊ូ អាល់កុល ឬជែល ។
សូមបញ្ជាក់ថា ប្រទេសយេីងរកឃេីញករណីជំងឺកូវីដ១៩ដំបូងបំផុតនៅថ្ងៃទី ២៧ មករា ២០២០ ។
យេីងបានធ្វេីតេស្តចំនួន ៤៣៩១៦៧ ស្មេីនឹង ២៦១៤០ ក្នុង១លាននាក់ ព័ត៌មានបន្ថែមសូមទាក់ទងលេខ 115 ។
ដោយឡែកសម្រាប់ករណីការចាក់វ៉ាក់សាំងការពារជំងឺកូវីដ១៩វិញ ក្រសួងសុខាភិបាល បានឲ្យដឹងថា ក្នុងរយៈពេល៧ថ្ងៃ ដោយគិតចាប់ពីថ្ងៃទី១០ ដល់ថ្ងៃទី១៦ ខែកុម្ភៈ ឆ្នាំ២០២១ មានអ្នកស្ម័គ្រចិត្តចាក់វ៉ាក់សាំងការពារជំងឺកូវីដ១៩ ស៊ីណូហ្វាម សរុបចំនួន ៣ ២១៩នាក់ ក្នុងនោះមានស្ត្រីចំនួន ១ ១៨៨នាក់ ហើយក្នុងចំនួននេះ អ្នកដែលបានចាក់វ៉ាក់សាំងរួចរាល់មានចំនួន ២៦១១នាក់ ក្នុងនោះមានស្រ្ដីចំនួន ៨៥៥នាក់ និងអ្នកដែលគ្រូពេទ្យមិនអនុញ្ញាតឱ្យចាក់វ៉ាក់សាំងមានចំនួន ៦០៨នាក់ ក្នុងនោះមានស្រ្ដីចំនួន ៣៣៣នាក់៕
