ក្រោយធ្វើចត្តាឡីស័ករកឃើញអ្នកវិជ្ជមាន ជំងឺកូវីដ-១៩ ចំនួន ៥នាក់ ឆ្លងពីអ្នកបើកបររថយន្តលក់ជីឱ្យក្រុមហ៊ុនគោខ្មែរ

ខេត្តប៉ៃលិន៖ ក្រោយពីធ្វើចត្តាឡីស័ក ប្រជាពលរដ្ឋ ដែលប៉ះពាល់ផ្ទាល់ជាមួយនឹងអ្នកបើកបររថយន្តលក់ជី​ឱ្យក្រុមហ៊ុនគោខ្មែរ អស់រយ:ពេលប៉ុន្មានថ្ងៃកន្លងទៅនេះ មកដល់ថ្ងៃទី២៧ ខែឧសភា ឆ្នាំ២០២១​នេះ ក្រុមឆ្លើយតបបន្ទាន់មន្ទីរសុខាភិបាលខេត្តប៉ៃលិន បានរកឃើញអ្នកវិជ្ជមានជំងឺកូវីដ-១៩ចំនួន ៤ករណី និង ១ករណី ធ្វើដំណើរមកពីភ្នំពេញគឺ ៖

ទី១. ឈ្មោះ ចាន់ រតនា ភេទប្រុស អាយុ៦៣ឆ្នាំ ជាកសិករ

ទី២. ឈ្មោះ ស៊ឹម សុផាន់ណា ភេទស្រី អាយុ៤៩ឆ្នាំ ជាកសិករ អ្នកទាំង ២ខាងលើ ជាប្តីប្រពន្ធ រស់នៅភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។ ពួកគាត់ ត្រូវបានរដ្ឋបាលខេត្ត តម្រូវឱ្យធ្វើចត្តាឡីស័ក ដោយសារធ្លាប់ប៉ះពាល់ជាមួយអ្នកជំងឺកូវីដ-១៩ម្នាក់ ឈ្មោះ នុម ដុង ភេទប្រុស អាយុ៣៦ឆ្នាំ ជាអ្នកចែក​ចាយជីកសិកម្មក្រុមហ៊ុនគោខ្មែរ រស់នៅខណ្ឌពោធិ៍សែនជ័យ រាជធានីភ្នំពេញ ដែលបានចូលមកស្នាក់ក្នុងខេត្តប៉ៃលិន កាលពីថ្ងៃទី១៥ ខែឧសភា ឆ្នាំ២០២១ កន្លងទៅ ។

ទី៣. ឈ្មោះ ណាត ម៉េងជូ ភេទស្រី អាយុ២០ឆ្នាំ ជាសិស្ស

ទី៤. ឈ្មោះ ណាត ម៉េងអាន ភេទស្រី អាយុ៧ឆ្នាំ ជាសិស្ស ទាំងពីរនាក់ជាបងប្អូនបង្កើត រស់នៅភូមិអូរបេង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ពួកគាត់ទាំងពីរនាក់ ត្រូវបានរដ្ឋបាលខេត្ត តម្រូវឱ្យធ្វើចត្តាឡីស័ក ព្រោះជាកូនអ្នកជំងឺកូវីដ-១៩ ឈ្មោះ គីម បូនី ដែលបានឆ្លងពីបុរសម្នាក់ ឈ្មោះ នុម ដុង ។

ទី៥. ឈ្មោះ កែ សុផាន់ណា ភេទប្រុស អាយុ៣៣ឆ្នាំ ជាអ្នកដឹកទំនិញ មានស្រុកកំណើតរស់នៅសង្កាត់ដេប៉ូ៣ ខណ្ឌទួលគោក រាជធានីភ្នំពេញ ។

ប្រវត្តិធ្វើដំណើររបស់ឈ្មោះ កែ សុផាន់ណា នៅថ្ងៃទី២៤ ខែឧសភា បានចេញដំណើរ ដោយជិះផាសអាប់ (Passapp) ចេញពីរាជធានីភ្នំពេញ ឆ្ពោះទៅខេត្តកំពង់ឆ្នាំង ស្នាក់នៅសណ្ឋាគារ (សុវណ្ណភូមិ) ១យប់ ។

នៅថ្ងៃទី២៥ ខែឧសភា ឆ្នាំ២០២១ បន្តដំណើរចេញពីខេត្តកំពង់ឆ្នាំង ឆ្ពោះទៅខេត្តពោធិ៍សាត់ ស្នាក់នៅសណ្ឋាគារ (ចន្ទមនីចន្ទ) ១យប់ ។ នៅថ្ងៃទី២៦ ខែឧសភា បានចេញដំណើរពីខេត្តពោធិ៍សាត់ មកខេត្តបាត់ដំបង ស្នាក់នៅសណ្ឋាគារឆាយា១យប់ ។ នៅថ្ងៃទី២៧ ខែឧសភា បានចេញដំណើរដោយជិះរថយន្តម៉ាកស្តារិច ពណ៌ទឹកប្រាក់ ពាក់ស្លាកលេខ ភ្នំពេញ 2AO-0715 ពីខេត្តបាត់ដំបង ឆ្ពោះមកខេត្តប៉ៃលិន លុះមកដល់ព្រំប្រទល់រវាងខេត្តទាំងពីរ ត្រូវមន្រ្តីសុខាភិបាលប្រចាំការនៅទីនោះ ធ្វើតេស្តរហ័សចំនួន ២លើក រកឃើញវិជ្ជមានជំងឺកូវីដ-១៩ ។

ចំណែកអ្នកប៉ះពាល់នឹងអ្នកជំងឺកូវីដ-១៩ ឈ្មោះ កែ សុផាន់ណា មានដូចជា អ្នកបើកបរម៉ូតូកង់បី (Passapp) ឈ្មោះ ភឿន សុខចំរើន ភេទប្រុស អាយុ២៥ឆ្នាំ ស្នាក់នៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ (ជាអ្នកដំណើរជាមួយគ្នា) ឈ្មោះ គ្រុយ រតនា ភេទប្រុស អាយុ៣៥ឆ្នាំ ស្នាក់នៅភូមិអូរដូនតាក្រោម ឃុំស្ទឹងត្រង់ ស្រុកសាលាក្រៅ ខេត្តប៉ៃលិន (ជាអ្នកដំណើរជាមួយគ្នា) ។

សូមបញ្ជាក់ថា ឈ្នោះ កែ សុផាន់ណា មិនទាន់បានឆ្លងចូលមកក្នុងខេត្តប៉ៃលិន ដូច្នេះ មិនទាន់មានការប្រាស្រ័យទាក់ទងជាមួយសាច់ញាតិ ឬបងប្អូនប្រជាពលរដ្ឋនៅក្នុងខេត្តប៉ៃលិននៅឡើយទេ ៕ ដោយ  កឹមឈៅ