នគរបាលឃាត់ខ្លួនយុវជនម្នាក់នឹង៥នាក់ទៀតរត់គេចខ្លួនពាក់ព័ន្ធអំពើលួចនិងប្លន់ម៉ូតូ
ខេត្តកណ្តាល៖ យ៉ាងហោចណាស់ក្រុមយុវជនចំនួន ៦នាក់ ដែលសង្ស័យពាក់ព័ន្ធករណីអំពើលួចនិងប្លន់ត្រូវបានកម្លាំងនគរបាលស្រុកលើកដែក ចុះធ្វើការឃាត់ខ្លួនបានម្នាក់។
ហេតុការណ៍នេះធ្វើឡើងនៅថ្ងៃសុក្រ៧ កេីត ខែទុតិយាសាឍ ឆ្នាំឆ្លូវ ត្រីសក័ ព.ស ២៥៦៥ ត្រូវនឹងថ្ងៃទី១៦ ខែកក្កដា ឆ្នាំ២០២១ វេលាម៉ោង២២នឹង៣០នាទីយប់។នៅចំណុចលើផ្លូវជាតិលេខ១ ស្ថិតនៅភូមិ ក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្តាល។ វត្ថុតាងចាប់យកមានម៉ូតូចំនួន ២គ្រឿង ៖
១-ម៉ូតូម៉ាក ICON ១គ្រឿង ពណ៌សលាយក្រហម ពាក់ស្លាកលេខ ភ្នំពេញ 1W-5973 ជារបស់ជនសង្ស័យ ២-ម៉ូតូម៉ាកហុងដា១២៥ សេរី២០១៩ ពណ៌ខ្មៅ ពាក់ស្លាកលេខ ព្រៃវែង 1E-7537 ជារបស់ជនរងគ្រោះ និងសោរមាត់(តូច.ធំ)ចំនួន ២០ដើម -កន្រ្តៃតូចកាត់ដែកសង្ក័សីចំនួន១ -ផ្លែដែកសម្រាប់បុកបេតុង ចំនួន១ -ទួលណឺវីស វ៉ាស់ភ្លើង ចំនួន១ -ទួលណឺវីស ផ្លែដែក ចំនួន១ – សោរតាន់(តូច.ធំ) ចំនួន ៣ដើម -ឧបករណ៍ សម្រាប់ បុកកាច់ក ម៉ូតូ ១ឈុត -កន្រ្តៃ ចំនួន១ -មេដែកឆក់ ចំនួន១ -ច្រវាក់នឹងមេសោរ ចំនួន១ -ទូរស័ព្ទដៃ ១គ្រឿង ម៉ាក OPPO ពណ៌ក្រហម(របស់ជនសង្ស័យ)
ជនរងគ្រោះ ១នាក់ ៖
១-ឈ្មោះ គង់ ឆៃឡុង ភេទប្រុស អាយុ២១ឆ្នាំ សញ្ជាតិខ្មែរ មានទីលំនៅ ឃុំព្រែកខ្សាយ(ក) ស្រុកពាមរក៍ ខេត្តព្រៃវែង ។
តាមការសាកសួរចម្លើយ សមត្ថកិច្ចទទួលបានពីព័ត៌មានជនសង្ស័យពាក់ព័ន្ធ ៦នាក់ទៀតភេទប្រុស៖
១-ឈ្មោះ ទន់ ស៊ីណា ហៅណេត ភេទប្រុស អាយុ៣៣ឆ្នាំ ជនជាតិខ្មែរ មុខរបរមិនពិត មានទីលំនៅភូមិគគីរ ឃុំគគីរធំ ស្រុកកៀនស្វាយ ខេត្តកណ្តាល (ឃាត់ខ្លួន)
២-ឈ្មោះ ថន ធុយ ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករសំណង់ មានទីលំនៅភូមិគគីរធំ ឃុំគគីរធំ ស្រុកកៀនស្វាយ ខេត្តកណ្តាល (កំពុងរត់គេចខ្លួន) និងបក្សពួក ៤នាក់ទៀតមិនស្គាល់អត្តសញ្ញាណកំពុងគេចខ្លួន ។
សូមបញ្ចាក់ថា បើយោងតាមសមត្ថកិច្ចឲ្យដឹងនៅថ្ងៃកើតហេតុខាងលើគឺជនរងគ្រោះបានជិះម៉ូតូម៉ាកហុងដាសេ១២៥ សេរី ២០១៩ ពណ៌ខ្មៅ ពាក់ស្លាកលេខ ព្រៃវែង 1E-7537 ទៅមើលបងគ្រោះថ្នាក់ចរាចរណ៍នៅច្បារអំពៅលុះពេលធ្វើដំណើរតាមផ្លូវមានម៉ូតូ ៣គ្រឿង មានគ្នា ៦នាក់ បានជិះតាមក្រោយម៉ូតូជនរងគ្រោះ ពេលជនរងគ្រោះជិះម៉ូតូមកដល់ចំណុចកើតហេតុខាងលើ ម៉ូតូជនសង្ស័យដែលជិះតាមពីក្រោយមានគ្នា ៦នាក់ ក្នុងនោះម៉ូតូ ២គ្រឿងមានគ្នា ៤នាក់បានជិះកៀបនិងម៉ូតូ ១គ្រឿងទៀត មានគ្នា២ បានធាក់ម៉ូតូជនរងគ្រោះ បណ្តាលឲ្យដួលធ្វើឲ្យជនរងគ្រោះ រងរបួសបាក់ឆ្អឹងដងកាំបិតខាងឆ្វេង ហើយជនសង្ស័យទាំង ២នាក់ បំរុងនឹងលើកម៉ូតូជនរងគ្រោះជិះ ត្រូវប្រជាជនចេញមកទាន់ ជនសង្ស័យទាំង ៦នាក់ បានជិះម៉ូតូគេចឡើងទៅភ្នំពេញ ។ ក្រោយពីសមត្ថកិច្ចទទួលបានព័ត៌មាននេះភ្លាម កម្លាំងប៉ុស្តិ៍រដ្ឋបាលកំពង់ភ្នំ បានសហការជាមួយកម្លាំងជំនាញនគរបាលយុត្តិធម៌ស្រុកលើកដែក ធ្វើការដេញតាមពីក្រោយរហូតដល់ឃុំសំរោងធំ ស្រុកកៀនស្វាយ ជនសង្ស័យបានបត់ចូលផ្លូវលំឆ្ពោះទៅទិសខាងលិចបានប្រហែលជាបីរយម៉ែត្រជនសង្ស័យបានបុកកន្ទុយរឺម៉កម៉ូតូដែលប្រជាពលរដ្ឋចតចោលនៅចិញ្ចើមផ្លូវ បណ្តាលឲ្យម៉ូតូជនសង្ស័យដួលខូចខាតផ្នែកក្បាលម៉ូតូ និងបែកក្បាលជនសង្ស័យហូឈាម ពេលនោះកម្លាំងយើងបានមកទាន់និងបានធ្វើការឃាត់ខ្លួនជនសង្ស័យបានម្នាក់ ឈ្មោះ ទន់ ស៊ីណា និងម៉ូតូ ១គ្រឿង រីឯជនសង្ស័យម្នាក់ទៀតឈ្មោះ ថន ធុយ បានរត់ចេចខ្លួនចូលព្រៃបាត់ រួចកម្លាំងយើងបាននាំជនសង្ស័យ និងម៉ូតូ មកកាន់អធិការដ្ឋាននគរបាលស្រុក ដើម្បីចាត់ការតាមនិតិវិធី ៕
