មហាសន្និបាតប្រចំាឆ្នាំ នៃអន្តរសភាអាស៊ាន លើកទី៤២ ត្រូវបានបិទបញ្ចប់ដោយ អនុម័តលើសេចក្តីព្រាងសេចក្តីសម្រេចចំនួន១៥
ក្រោយពីបានដំណើរការមហាសន្និបាតរយៈពេលបីថ្ងៃមកនេះ មហាសន្និបាតប្រចំាឆ្នាំ នៃអន្តរសភាអាស៊ាន ហៅកាត់ថា AIPA លើកទី៤២ ដែលសភាប្រទេសព្រុយណេដារូស្សាឡាម ធ្វើជាម្ចាស់ផ្ទះ ក្រោមមូលបទស្តីពី “ជំរុញកិច្ចសហប្រតិបត្តិការ សភាលើបរិយាប័ន្នឌីជីថល ឆ្ពោះទៅសហគមន៍អាស៊ានឆ្នាំ២០២៥” បានបិទបញ្ចប់ដោយជោគជ័យ ដោយបានអនុម័តលើសេចក្តីព្រាងសេចក្តីសម្រេចចំនួន១៥។
ឯកឧត្តម ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភាបានថ្លែងក្នុងសន្និសីទសារព័ត៌មានស្តីពីលទ្ធផលនៃការចូលរួមរបស់គណៈប្រតិភូជាន់ខ្ពស់សភាកម្ពុជា ក្នុងមហាសន្និបាតអន្តរសភា អាស៊ាន (AIPA) លើកទី៤២ កាលពីរសៀលថ្ងៃទី២៥ ខែសីហា ឆ្នាំ២០២១ នៅវិមានរដ្ឋ សភាបានឱ្យដឹងថា មហាសន្និបាតប្រចំាឆ្នាំ នៃអន្តរសភាអាស៊ាន ហៅកាត់ថា AIPA លើកទី៤២ ដែលសភាប្រទេសព្រុយណេដារូស្សាឡាម ធ្វើជាម្ចាស់ផ្ទះ បានបិទបញ្ចប់ដោយជោគជ័យ ដោយបានអនុម័តលើសេចក្តីព្រាងសេចក្តីសម្រេចចំនួន១៥ រួមមាន៖
១- សេចក្តីព្រាងសេចក្តីសម្រេចលើរបាយការណ៍ហិរញ្ញវត្ថុឆ្នាំ២០២០-២០២១ ។
២- សេចក្តីព្រាងសេចក្តីសម្រេចលើការអនុញ្ញាត ឱ្យប្រើមូលនិធិពិសេសសម្រាប់ចំណាយក្នុងការជួយដល់ការបែងចែកថ្លៃសេវាផ្សេងៗនៃទីតាំងថ្មីរបស់លេខា ធិការដ្ឋានអាយប៉ា និងសម្រាប់ការកែសម្រួលផ្នែកតូចមួយនៅក្នុងប្រាក់ខែបុគ្គលិក ដើម្បីជ្រើសរើសមន្ត្រីថ្មី នៃលេខាធិការដ្ឋានអាយប៉ា។
៣-សេចក្តីព្រាងសេចក្តីសម្រេចលើការព្យាករណ៍ថវិកាឆ្នាំ២០២១-២០២២។
៤- សេចក្តីព្រាងសេចក្តីសម្រេច លើរបាយការណ៍ប្រចាំឆ្នាំរបស់លេខាធិការដ្ឋានឆ្នាំ២០២០-២០២១។
៥- សេចក្តីព្រាងសេចក្តីសម្រេចលើការទទួលស្គាល់សភាអ៊ុយក្រែនជាអ្នកសង្កេតការណ៍អាយប៉ា។
៦- សេចក្តីព្រាងសេចក្តីសម្រេចលើការទទួលស្គាល់សភាប៉ាគីស្ថានជាអ្នក សង្កេតការណ៍អាយប៉ា។
៧- សេចក្តីព្រាងសេចក្តីសម្រេចលើការធ្វើវិសោធនកម្ម លក្ខន្តិកៈអាយប៉ា។
៨- សេចក្តីព្រាងសេចក្តីសម្រេចលើគោលការណ៍ណែនាំនិងនីតិវិធីសម្រាប់ការធ្វើជាម្ចាស់ ផ្ទះមហាសន្និបាតអាយប៉ា។
៩- សេចក្តីព្រាងសេចក្តីសម្រេចលើគោលការណ៍ណែនាំនិងនីតិវិធី នៃការសន្ទនាអាយប៉ា-អាស៊ាន ។
១០- សេចក្តីព្រាងសេចក្តីសម្រេចលើវិធាន និងនីតិវិធីរបស់សមាជិកសភាវ័យក្មេងអាយប៉ា។
១១- សេចក្តីព្រាងសេចក្តីសម្រេចលើការបង្កើតការ សន្ទនាអាយប៉ា និងសភាអ៊ឺរ៉ុប។
១២- សេចក្តីព្រាងសេចក្តីសម្រេចលើការផ្តល់ពានរង្វាន់កិត្តិយសអាយប៉ា ជូនឯក ឧត្តមកិត្តិសេដ្ឋាបណ្ឌិត ជាម យៀប។
១៣- សេចក្តីព្រាងសេចក្តីសម្រេចលើការផ្តល់ពានរង្វាន់កិត្តិយសអាយប៉ា ជូនឯកឧត្តម បណ្ឌិត FADI ZON ។
១៤- សេចក្តីព្រាងសេចក្តីសម្រេចលើការកោតសរសើរចំពោះប្រធានអាយប៉ា និង
១៥- សេចក្តីព្រាងសេចក្តីសម្រេចលើកាលបរិច្ឆេទនិងទីកន្លែងនៃមហាសន្និបាតអាយប៉ាលើកទី៤៣ ដែលនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី១៦ ខែកញ្ញា ឆ្នាំ២០២២ នៅរាជធានីភ្នំពេញ ។
តាមរបាយការណ៍របស់មហាសន្និបាតបានឱ្យដឹងថា អន្តរសភាអាស៊ាន (AIPA) ជាអង្គការអន្តរសភា តំណាងស្ថាប័ននីតិប្បញ្ញត្តិ នៃបណ្តាប្រទេសជាសមាជិកសមាគមប្រជាជាតិអាស៊ីអាគ្នេយ៍(ASEAN) ដែលមាន ប្រទេសព្រុយណេដារូស្សាឡាម កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។ វេទិកាសភានេះ ជាការប្រមូលផ្តុំសំឡេងប្រជាពលរដ្ឋក្នុងសហគមន៍អាស៊ាន ជាដៃគូរបស់អាស៊ាន ក្នុងការជំរុញឱ្យសម្រេចបាននូវគោលដៅសហគមន៍អាស៊ានតែមួយ។ អន្តរសភាអាស៊ាន រៀបចំមហាសន្និបាតប្រចំាឆ្នាំ នៅរៀងរាល់ឆ្នាំ ដោយប្រទេសជាសមាជិកប្តូរវេន រៀបចំតាមលំដាប់អក្ខរក្រម នៃឈ្មោះប្រទេសតាមអក្សរឡាតំាង៕ by AKP