ខេត្តសៀមរាប៖ នៅព្រឹកថ្ងៃទី២១ ខែកញ្ញា ឆ្នាំ២០២១នេះ ឯកឧត្តមនាយឧត្តមសេនីយ៍ ឃឹម ប៊ុនសុង រដ្ឋលលេខាធិការក្រសួងការពារជាតិ និងជាតំណាងដ៏ខ្ពង់ខ្ពស់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំប្រតិភូ នៃក្រសួងការពារជាតិ ចុះសួរសុខទុក្ខបងប្អូនជានាយទាហាន នាយទាហានរង និងពលទាហាន ដែលកំពុងរស់នៅក្នុងមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧ ខេត្តសៀមរាប ចំនួន ៣១០គ្រួសារ ក្នុងឱកាស នៃពិធីបុណ្យភ្ជុំ បិណ្ឌ ដែលនឹងប្រព្រឹត្តទៅនៅពេលខាងមុខនេះ។

មានប្រសាសន៍ក្នុងឱកាសនោះ ឯកឧត្តមនាយឧត្តមសេនីយ៍ ឃឹម ប៊ុនសុង បានពាំនាំនូវប្រសាសន៍ផ្តាំផ្ញើសាកសួរសុខទុក្ខ ពីសំណាក់សម្តេចតេជាយ ហ៊ុន សែន នាយករដ្ឋមន្ត្រី នៃកម្ពុជា, សម្តេចកិត្តិព្រឹទ្ធបណ្ឌិត​ប៊ុន រ៉ានី ហ៊ុន សែន និងសម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្ត្រីក្រសួងការពារជាតិ និង លោកជំទាវ ដែលជានិច្ចកាលសម្តេចតែងតែ គិតគូរពីសុខទុក្ខ និង ជីវភាពរស់នៅរបស់បងប្អូនយោធិនពិការ ក្នុងមជ្ឈមណ្ឌលអភិវឌ្ឍយោធិនពិការ ទាំងអស់ ជាពិសេសក្នុងរដូវបុណ្យទានជាប្រពៃណីជាតិ ដើម្បីសម្ដែងនូវការដឹងគុណចំពោះវីរភាព ក្នុងស្មារតីដ៏មុះមុតរបស់បងប្អូនយោធិនពិការទាំងអស់ ដែលបាន បូជាសាច់ស្រស់ឈាមស្រស់ ការពារបូរណភាពដែនដី និងរកសុខសន្តិភាពជូនជាតិមាតុភូមិក្នុងរយ:កាលកន្លងមក។

ឯកឧត្តមនាយឧត្តមសេនីយ៍ ឃឹម ប៊ុនសុង មានប្រសាសន៍ទៀតថា បច្ចុប្បន្ននេះ ជំងឺកូវីដ-១៩នេះ នៅតែបន្តឆ្លងរាលដាលដល់ប្រជាពលរដ្ឋ ក្នុងខេត្តយើងនៅឡើយទេ ដូច្នេះដើម្បីទប់ស្កាត់ការឆ្លងរាលដាលនៃជំងឺកូវីដ-១៩នេះ សូមបងប្អូនយោធិនពិការទាំងអស់ ត្រូវចូលរួមជាមួយរាជរដ្ឋាភិបាល និងអាជ្ញាធរខេត្ត ព្រមទាំងអាជ្ញធរគ្រប់លំដាប់ថ្នាក់ អនុវត្តឲ្យបានខ្ជាប់ខ្ជួន តាមវិធានការនានារបស់ក្រសួងសុខាភិបាល ជាពិសេសវិធានការរបស់រាជរដ្ឋាភិបាលគឺ ៣កុំ និង ៣ការពារ បើទោះបីជាបងប្អូនយោធិនពិការយើង ធ្លាប់បានចាក់វ៉ាក់សាំងការពារជំងឺកូវីដ-១៩ គ្រប់ដូសហើយក៏ដោយ។

ក្នុងឱកាសនោះដែរ ឯកឧត្តមនាយឧត្តមសេនីយ៍ បាននាំយកអំណោយរបស់សម្តេចពិជ័យសេនា ទៀ បាញ់ ប្រគល់ជូនដល់គ្រួសារយោធិនពិការទាំង ៣១០គ្រួសារ ដែលក្នុងមួយគ្រួសារៗទទួលបាន៖ ត្រីខ  មី ស្ករស ទឹកដោះគោ និងថវិកាចំនួន ៣ម៉ឺនរៀល និងផ្ដល់ថវិកាចំនួន ៣លានរៀល សម្រាប់ប្រើប្រាស់ក្នុងមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧សៀមរាប៕