FFC ចេញបញ្ជីឈ្មោះផ្លូវការក្រុមបាល់ទាត់ជម្រើសជាតិកម្ពុជាសម្រាប់វគ្គជម្រុះពីរព្រឹត្តិការណ៍នៃទ្វីបអាស៊ី
សហព័ន្ធកីឡាបាល់ទាត់កម្ពុជា (FFC) បានចេញបញ្ចីកីឡាករបាល់ទាត់ជម្រើសជាតិកម្ពុជាសរុបចំនួន ៣៦នាក់ សម្រាប់ការប្រកួតជម្រុះពានរង្វាន់ចំនួនពីរ គឺពានរង្វាន់ AFC ASIAN CUP CHINA 2023 និង AFC U23 ASIAN CUP Uzbekistan 2022 ដែលការប្រកួតចាប់ផ្ដើមពីថ្ងៃទី០៩ ដល់ថ្ងៃទី២៦ ខែតុលា ឆ្នាំ២០២១ នៅប្រទេសបារ៉ែន និងប្រទេសជប៉ុន។
សម្រាប់ការប្រកួតជម្រុះ AFC Asian Cup China 2023 ក្រុមជម្រើសជាតិកម្ពុជានឹងត្រូវប្រកួតជាមួយក្រុមកោះហ្គាំ ក្នុងវគ្គ Play-Off ទាំង២ជើងនៅទឹកដីកណ្តាលនៃប្រទេសបារ៉ែន ដោយប្រកួតជើងទី១ នាថ្ងៃទី០៩ ខែតុលា ខណៈជើងទី២ ប្រកួតនៅថ្ងៃទី១២ ខែតុលា ឆ្នាំ២០២១។ ចំពោះ១ក្រុម ដែលទទួលបានជ័យជម្នះ សរុបទាំងពីរជើងនឹងឡើងទៅវគ្គចែកពូល នៃវគ្គជម្រុះជុំទី៣បន្ដ ដែលនឹងប្រកួតនាឆ្នាំ២០២២ ដើម្បីប្រជែងកៅអីជុំផ្ដាច់ព្រ័ត្រនៅប្រទេសចិន នាឆ្នាំ២០២៣។
ដោយឡែកសម្រាប់ការប្រកួត AFC U23 Asian Cup 2022 គឺក្រុមជម្រើសជាតិកម្ពុជា ស្ថិតនៅក្នុងពូល K ជាមួយក្រុមជម្រើសជាតិជប៉ុន និងហុងកុង ដែលវគ្គជម្រុះនេះ ប្រទេសជប៉ុនទទួលធ្វើម្ចាស់ផ្ទះ។ សម្រាប់កម្មវិធីប្រកួតជម្រុះពានរង្វាន់ជើងឯកយុវជនអាយុក្រោម២៣ឆ្នាំ ប្រចាំទ្វីបអាស៊ីនេះ គ្រោងចាប់ផ្ដើមពីថ្ងៃទី២៣ ដល់ថ្ងៃទី៣១ ខែតុលា ឆ្នាំ២០២១ ខាងមុខ ដើម្បីស្វែងរកក្រុមខ្លាំងៗ ឡើងទៅជុំចុងក្រោយ នៅប្រទេសអ៊ូបេគីស្ថាន ដែលគ្រោងធ្វើការប្រកួតពីថ្ងៃទី០១-១៩ ខែមិថុនា ឆ្នាំ២០២២។
សូមបញ្ជាក់ថា នៅក្នុងបញ្ជីឈ្មោះ ៣៦នាក់ ត្រៀមការប្រកួតជម្រុះទាំងពីរព្រឹត្តិការណ៍នៃទ្វីបអាស៊ីនេះ គឺកីឡាករ ចាន់ វឌ្ឍនានា នៃក្លឹបបឹងកេតត្រូវបានកោះហៅចូលហ្វឹកហាត់ និងប្រកួតឡើងវិញ ក្រោយខកខាន ជាច្រើនលើក ក្នុងក្រុមជម្រើសជាតិកម្ពុជា។ ក្រៅពីនេះកីឡាករជម្រើសជាតិស៊េរីចាស់ៗ និងយុវជនលេចធ្លោមួយចំនួនទៀត ដូចជា កែវ សុខផេង, កែវ សុខសិលា, សៀង ចន្ធា, ច្រឹង ពលរដ្ឋ ក៏បានបង្ហាញវត្តមានត្រៀមការប្រកួតនេះដូចគ្នាផងដែរ។
ជាមួយគ្នានោះ កីឡាករវ័យក្មេងអាយុក្រោម ១៩ឆ្នាំ នៃក្រុមជម្រើសជាតិកម្ពុជា លីម អារុណរ៉េយមេន មកពីក្លឹបអាជីព បឹងកេត ក៏ត្រូវបានសហព័ន្ធកីឡាបាល់ទាត់ផ្តល់ឱកាសឱ្យជួយក្រុមនៅក្នុងការប្រកួតធំៗប្រចាំទ្វីបអាស៊ីដូចគ្នាផងដែរ។ ជាមួយគ្នានេះ គេនៅចាំបានថា កីឡាករ លីម អារុណរ៉េយមេន គឺជាកូនខ្មែរ-ណូវែលសេឡង់ ដែលមានបំណងប្រាថ្នាចង់ក្លាយជាកីឡាករជម្រើសជាតិ ហើយពេលនេះ ក្តីសុបិនរបស់យុវជនរូបនេះបានសម្រេចហើយៗកំពុងខិតខំប្រឹងប្រែងដុះខាត់សមត្ថភាពរបស់ខ្លួនឱ្យកាន់តែមុតស្រួចបន្ថែមទៀត ក្រោមការផ្តល់កម្លាំងចិត្តរបស់ម្តាយ និងឪពុក គឺលោក លីម គុណ ក៏ដូចជាក្លឹប បឹងកេត និងសហព័ន្ធកីឡាបាល់ទាត់កម្ពុជា៕ by AKP(ហេង ណាលីន)
