ករណីអំពើហឹង្សាក្នុងគ្រួសារមួយបានកើតឡើងបង្កអោយមានការភ្ញាក់ផ្អើលអ្នកភូមិ
ខេត្តបន្ទាយមានជ័យ៖ ថ្ងៃសៅរ៍ ០៣កើត ខែអស្សុជ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០៩ ខែតុលា ឆ្នាំ២០២១ វេលាម៉ោង១០និង២០នាទីនៅក្នុងលំនៅឋានស្ថិតក្នុងភូមិវាលហាត់ ឃុំម៉ាឡៃ ស្រុកម៉ាឡៃខេត្តបន្ទាយមានជ័យ ករណីហិង្សាក្នុងគ្រួសារនេះបង្កឡើងដោយជនសង្ស័យឈ្មោះ ប៉ុង សិទ្ធ ភេទប្រុស អាយុ៣១ឆ្នាំ ស្នាក់នៅភូមិកើតហេតុ(ផ្ទះបងស្រីបង្កើត) បានធ្វើសកម្មភាពយកកូនកាំបិទចិតបន្លៃដងជ័រប្រវែង ៣០សង់ទីម៉ែត្រ ចាក់ទៅលើប្រពន្ធឈ្មោះ ស៊ីម មុំ ភេទស្រី អាយុ២៤ឆ្នាំ រស់នៅភូមិក្បាលស្ពាន ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ បណ្តាលឱ្យរងរបួសកដៃស្តាំ និងបំពង់កឆ្វេង(ស្ថានភាពធ្ងន់)ហើយចំណែកឯកជនសង្ស័យឈ្មោះ ប៉ុង សិទ្ធ ត្រូវជាប្តីបានយកកាំបិទខាងលើ អាកខ្លួនឯង(របួសស្ថានភាពស្រាល)។
បច្ចុប្បន្នអ្នកទាំងពីរត្រូវបានយកទៅព្យាបាលនៅមន្ទីរពេទ្យបង្អែកស្រុកម៉ាឡៃ។ ឆ្លងតាមការស្រាវជ្រាវពីបងស្រីបង្កើតរបស់ឈ្មោះ ប៉ុង សិទ្ធ ដែលបានជួបសន្ទនាគ្នាជាមួយឈ្មោះ ប៉ុង សិទ្ធ មុនកើតហេតុ បានប្រាប់ថា ប្អូនរបស់គាត់មានជំងឺសរសៃប្រាសាទហើយគាត់បានឱ្យប្រពន្ធរបស់ ប៉ុង សិទ្ធ ទិញថ្នាំសរសៃប្រាសាទឱ្យប្អូនគាត់លេប តែឈ្មោះ ប៉ុង សិទ្ធ ចោទប្រពន្ធថា ប្រពន្ធឱ្យខ្លួនលេបថ្នាំ កណ្តុរទៅវិញ ទើបធ្វើឱ្យឈ្មោះ ប៉ុង សិទ្ធ ខឹងនឹងប្រពន្ធក៍ទាញកូនកាំបិទចាក់ប្រពន្ធ បន្ទាប់មកអារកខ្លួនឯង ពាក់ព័ន្ធករណីនេះ សមត្ថកិច្ចកំពុងដំណើរការតាមនីតិវិធី៕
