រដ្ឋបាលខេត្តបន្ទាយមានជ័យ រៀបចំពិធីបិទយុទ្ធនាការចាក់វ៉ាក់សាំងការពារជំងឺកូវីដ១៩ជុំទី១ ជូនប្រជាពលរដ្ឋមានអាយុចាប់ពីអាយុ១៨ឆ្នាំឡើងនៅទូទាំងខេត្តបន្ទាយមានជ័យ

ខេត្តបន្ទាយមានជ័យ៖ កិច្ចប្រជុំនេះបានធ្វើឡើងនៅព្រឹកថ្ងៃទី១៤ ខែតុលា ឆ្នាំ២០២១ ដោយមានការអញ្ជើញចូលរួមពីសំណាក់ឯកឧត្តម ខេង ស៊ុម ប្រធានក្រុមប្រឹក្សាខេត្តឯកឧត្តម លោកជំទាវ អភិបាលរងខេត្ត លោកឧត្តមសេនីយ៍មេបញ្ជាការគ្រប់កងឯកភាព លោកអភិបាលក្រុង-ស្រុក លោក លោកស្រីប្រធានមន្ទីរ-អង្គភាពជុំវិញខេត្ត លោកគ្រូ អ្នកគ្រូពេទ្យ និងសមាជិក សមាជិកា។

ក្នុងនោះដែរឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យបានអានរបាយការណ៍សង្ខេបស្តីអំពីលទ្ធផលការងារនៃគណៈកម្មការខេត្តប្រយុទ្ធនឹងជំងឺកូរីដ-១៩នេះថា៖ខេត្តបន្ទាយមានជ័យ ជាខេត្តមួយក្នុងចំណោមរាជធានី ខេត្តទាំង២៥ទូទាំងប្រទេស ។ មានព្រំប្រទល់ជាប់នឹងព្រះរាជាណាចក្រថៃឡង់ដ៏ប្រវែង ១៥៣គីឡូម៉ែត្រ មានខេត្តស្រះ​ចំនួន៤​ជាប់និងខេត្ត​បន្ទាយមានជ័យ​ ស្រុកអារញ្ញប្រាថេត ស្រុកគោកធ្យូង ស្រុកតាបាយ៉ា និងស្រុកខ្នងហាត ខេត្តបុរីរ៉ាំចំនួន១ស្រុក គឺស្រុក ឡាក់ហានសៃ ។

ផ្ទៃដីសរុប៦.៦៧៩គម២ ចែកចេញជាក្រុងចំនួន២ ស្រុក៧ ឃុំ៥៥ សង្កាត់១០ ភូមិទទួលស្គាល់ដោយក្រសួងមហាផ្ទៃចំនួន៦៥៨ភូមិ និងភូមិមិនទាន់ទទួលស្គាល់ដោយក្រសួងមហាផ្ទៃចំនួន១២ភូមិ មានប្រជាពលរដ្ឋចំនួន១៩៤.៨៦៣គ្រួសារ មនុស្សចំនួន៨១៥.៥២២នាក់ ក្នុងនោះស្រី៤០៦.៤៨១នាក់ ដង់ស៊ីតេប្រជាពលរដ្ឋ ១១ ២១២នាក់ក្នុង១គ.ម២ ។ អាយុ១៨ឆ្នាំ ឡើងមានចំនួន ៥២៩.៦៨១នាក់ ស្រី ២៦៥ ៩៥៨នាក់ គិតជាភាគរយធៀបនឹងចំនួនប្រជាពលរដ្ឋសរុបស្មើនឹង ៦៤,៩៥% ។

ចាប់ពីមានការផ្ទុះរីករាលដាលនៃជំងឺកូវីដ១៩ លើពិភពលោក ព្រះរាជាណាចក្រកម្ពុជា ក៏ដូចខេត្តបន្ទាយមានជ័យ រដ្ឋបាលខេត្ត អាជ្ញាធរគ្រប់លំដាប់ថ្នាក់ មន្ទីរ អង្គភាព កងកម្លាំងប្រដាប់អាវុធខិតខំយកចិត្តទុក​ដាក់​ជាប់ជាប្រចាំ ក្នុងការអនុវត្តយ៉ាងខ្ជាប់ខ្ជួននូវបទបញ្ជារបស់រាជរដ្ឋាភិបាល ក៏ដូចសេចក្តីណែនាំរបស់ក្រសួងសុខាភិបាល ដោយបានរៀបចំ និងដាក់ចេញនូវផែនការ សេចក្តីសម្រេច សេចក្តីណែនាំ និងវិធានការចាំចាច់នានារបស់រដ្ឋបាលខេត្តក្នុងការទប់ស្កាត់នូវការរីករាលដាលជំងឺកូវីដ១៩ ទាំងការចូលពីខាងក្រៅតាមរយៈបងប្អូនវិលត្រឡប់ពីប្រទេសថៃ និងតាមរយៈ ព្រឹត្តិការណ៍សហគមន៍២០កុម្ភៈ ពិសេសជំងឺកូវីដ១៩​បំលែងថ្មីDeltaដែលកំពុងចរាចរទូទាំងប្រទេសគួរឱ្យព្រួយបារម្ភ។

ចំណាត់ការសំខាន់ៗដែលរដ្ឋបាលខេត្តបានរៀបចំរួមមាន៖ -ការរៀបចំកម្លាំងឈរជើងតាមបន្ទាត់ព្រំដែន ដើម្បីទប់ស្កាត់ការចូលខុសពីទីតាំងដែលខេត្តបានរៀបចំ។ -ការរៀបចំក្រុមការងារទទួល សម្របសម្រួល​ជូនបងប្អូនពលករចំនួន៤ទីតាំង (ទីតាំងច្រកចំបក់ស្រុកម៉ាឡៃ-ច្រកអន្តរជាតិប៉ោយប៉ែត ទីតាំងច្រកអូរបីជាន់ស្រុកអូរជ្រៅ និងទីតាំងច្រកបឹងត្រកួនស្រុកថ្មពួក ) គ្រប់បងប្អូនពលករចូលមកសុទ្ធតែត្រូវបានយកសំណាកធ្វើតេស្តរហ័ស (អ្នកវិជ្ជមានបញ្ជូនចូលមណ្ឌលព្យាបាល និងអ្នកអវិជ្ជមានបញ្ជូនចូលមណ្ឌល​ចត្តា​ឡីស័ក)។

ការរៀបចំមណ្ឌលចត្តាឡីស័កបន្ថែមតាមក្រុង ស្រុក ដែលមុននេះមាន២៣មណ្ឌល បានប្រើប្រាស់នូវអគារសិក្សា ដែលជាអំណោយដ៏ថ្លៃថ្លារបស់សម្តេច អគ្គមហាសេនាបតីតេជោហ៊ុន សែន តែបច្ចុប្បន្នមណ្ឌលកំពុងប្រើប្រាស់មាន១២មណ្ឌល ។

ក្នុងពេលដែលមណ្ឌលថ្មីកំពុងសាងសង់នៅភូមិកូបធំ សង្កាត់និមិត្ត ក្រុងប៉ោយប៉ែតរចូលជាស្ថាពរ អាចទទួលបងប្អូនធ្វើចត្តាឡីស័កប្រមាណជាង២០០០នាក់ (រដ្ឋបាលខេត្តនឹងបង្រួម ហើយប្រគល់សាលារៀនជូនមន្ទីរអប់រំ យុវជន និងកីឡាខេត្ត ដើម្បីបើកដំណើរការសាលារៀនឡើងវិញ។

ការរៀបចំមណ្ឌលព្យាបាលកូវីដ-១៩ សរុបពីមុនមាន១៧មណ្ឌល តែបច្ចុប្បន្នមានចំនួន៨ មណ្ឌលក្នុងនោះសម្រាប់កំរិតធ្ងន់មាន២មណ្ឌលគឺមន្ទីរពេទ្យខេត្ត និងមន្ទីរពេទ្យបង្អែកក្រុងប៉ោយប៉ែត សម្រាប់កំរិតស្រាលមណ្ឌលដែលទើបកសាង និងរៀបចំថ្មីៗនេះ មាន២មណ្ឌល គឺនៅភូមិខ្លាកូនថ្មី ១កន្លែង និងនៅបូរីជ័យ២ ភូមិចំការតាដោក១កន្លែង មានវិសាលភាពអាចទទួលបានអ្នកជំងឺច្រើន។

ការព្យាបាលតាមផ្ទះ បានរៀបចំក្រុមការងារថ្នាក់ខេត្ត និងថ្នាក់ក្រុង ស្រុកទាំង៩ និងមានប្រព័ន្ធទូរស័ព្ទ Hot Line 5222 គ្រប់ក្រុង ស្រុក ។ ចំនួនបាន និងកំពុងព្យាបាលនៅតាមផ្ទះមានចំនួន៤៥៨នាក់ ស្រី២២៦នាក់។ -តាមការណែនាំថ្មីៗ របស់សម្តេចតេជោនាយករដ្ឋមន្ត្រី ប្រមុខរាជរដ្ឋាភិបាល និងរបស់ក្រសួងសុខាភិបាល គឺ មិនឱ្យមានការស្រាវជ្រាវរកអ្នកវិជ្ជមានដោយការធ្វើតេស្តរហ័សនោះ ខេត្តបានជំរុញការតាមដាន ចំពោះគ្រួសារដែលពាក់ព័ន្ធនឹងអ្នកវិជ្ជមាន ដោយឱ្យធ្វើចត្តាឡីស័ក ហើយផ្តល់ថ្នាំចិនឱ្យទទួលទានតាមផ្ទះតាមការណែនាំរបស់ក្រសួងសុខាភិបាលចំពោះអ្នកពាក់ព័ន្ធផ្ទាល់ ព្រមទាំងផ្តល់ស្បៀងពេលបិទខ្ទប់។

ការរៀបចំកន្លែងបូជា និងបញ្ចុះសពមានទីតាំងស្ថិតនៅភូមិភ្នំបាក់ សង្កាត់ទឹកថ្លា ក្រុងសិរីសោភ័ណ បានរៀបចំកន្លែងបញ្ចុះសព ខ្មែរ-ឥស្លាម គ្រឹស្ទាន និងខ្មែរ-ចិន *បានរៀបចំឈាបដ្ឋានសម្រាប់បូជាសព ស្ថាន​ភាពអ្នកស្លាប់៖ ចំនួនអ្នកស្លាប់ដោយជំងឺកូវីដ-១៩ គិតត្រឹមថ្ងៃទី១២ ខែតុលា២០២ ១ មានចំនួនសរុប ២៥០នាក់ ស្រី ១៣៨នាក់ (ខ្មែរ ២៤៤នាក់ ស្រី ១៣៥ នាក់ ជនបរទេស៦នាក់ ស្រី៣នាក់ ) ក្នុង ២៤៤នាក់ បានចាក់វ៉ាក់សាំងចំនួន ៤៩នាក់ និងមិនបានចាក់វ៉ាក់សាំងចំនួន ១៩៥នាក់ ។