ភ្នំពេញ៖ ក្នុងសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ បានបង្ហាញថា រាជរដ្ឋាភិ​បាល​ មានគម្រោងចំណាយថវិកាថ្នាក់ជាតិ ត្រូវបានគ្រោងក្នុងចំនួន ៣២ ៥៧៦,៩ប៊ីលានរៀល (ប្រមាណ ៨ ០១៣លានដុល្លារអាម៉េរិក) ត្រូវជា ២៦,២៤ភាគរយ នៃ ផ.ស.ស. ដែលកើនឡើង ៦,៨ភាគរយ បើ​ធៀប​នឹងឆ្នាំ២០២១ និងគម្រោងចំណូលថវិកាថ្នាក់ជាតិ ត្រូវបានគ្រោងក្នុងចំនួន ២៣ ៤៦២,៦ប៊ីលាន​រៀល (ប្រមាណ ៥ ៧៧១ លានដុល្លារអាម៉េរិក) ត្រូវជា ១៨,៩ភាគរយ នៃ ផ.ស.ស. ដែលកើនឡើង ១៧,៧​ភាគរយ បើធៀបទៅនឹងឆ្នាំ២០២១។

នេះបើយោងតាមសេចក្ដីប្រកាសព័ត៌មាន ស្ដីពីលទ្ធផលនៃសម័យប្រជុំពេញអង្គគណៈរដ្ឋមន្ត្រី ចេញផ្សាយថ្ងៃសុក្រ ១រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែតុលា ឆ្នាំ២០២១ ។ សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ គឺជាថវិកាឆ្នាំទី៤ នៃអាណត្តិរាជរដ្ឋាភិបាល នីតិកាលទី៦ នៃរដ្ឋសភា ដែលត្រូវបានរៀបចំឡើងនៅក្នុងបរិការណ៍ដែលប្រទេសកម្ពុជាកំពុងស្ថិតនៅកណ្ដាលនៃវិបត្តិកូវីដ-១៩នៅឡើយ បន្ទាប់ពីព្រឹត្តិការណ៍សហគមន៍ ២០កុម្ភៈ ២០២១ និងការបន្តរីករាលដាលនៃមេរោគកូរ៉ូណាបំប្លែងថ្មីជាបន្តបន្ទាប់ ដែលបានបង្កឱ្យមានផលប៉ះពាល់អវិជ្ជមានធ្ងន់ធ្ងរដល់សុខភាព សង្គម សេដ្ឋកិច្ច និងជីវភាពរស់នៅរបស់ប្រជាពលរដ្ឋ ព្រមទាំងកំពុងដាក់សម្ពាធកាន់តែធ្ងន់ធ្ងរមកលើថវិកាជាតិ។

សេចក្ដីប្រកាសព័ត៌មានបន្តថា ក្រោមការដឹកនាំដ៏ប៉ិនប្រសប់ វៃឆ្លាត និងម៉ឺងម៉ាត់របស់សម្ដេចតេជោនាយករដ្ឋ​មន្ត្រី និងជាប្រមុខនៃរាជរដ្ឋាភិបាល និងក្នុងឋានៈជាអគ្គមេបញ្ជាការតែមួយនៃការគ្រប់គ្រងហិរញ្ញវត្ថុសា​ធា​រណៈ​ សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ត្រូវបានរៀបចំនិងវិភាជន៍សម្រាប់​ការអនុវត្តសកម្មភាពអាទិភាព ដែលត្រូវបានកំណត់ក្នុងកម្មវិធីនិងអាទិភាពគោលនយោបាយសំខាន់ៗ របស់រាជរដ្ឋាភិបាល ក្នុងនោះរួមមានជាអាទិ៍៖ ការទប់ទល់នឹងការរាតត្បាតនិងកាត់បន្ថយផលប៉ះពាល់នៃជំងឺកូវីដ-១៩ ការស្ដារនិងជំរុញកំណើនសេដ្ឋកិច្ចឱ្យស្ទុះងើបឡើងវិញ ដើម្បីបន្តបង្កើតការងារជូនប្រជាជន ជាពិសេសស្រទាប់យុវជន ផ្ដល់លទ្ធភាពឱ្យប្រជាជនទទួលបានប្រាក់ចំណូលខ្ពស់ឡើងវិញ និងជំរុញបង្កើនចំណូលថវិកាជាតិ ការបន្តអភិវឌ្ឍន៍ធនធានមនុស្ស ការបន្តកសាងហេដ្ឋារចនាសម្ព័ន្ធរូបវន្ត ការបន្តអភិវឌ្ឍន៍​និងបង្កើនតម្លៃបន្ថែមនៃវិស័យកសិកម្ម ការកសាងប្រព័ន្ធគាំពារសង្គមរឹងមាំ និងប្រព័ន្ធសុខាភិ​បាល ​ប្រកប​ដោយ​គុណភាព និងមានភាពឆ្លើយតបខ្ពស់ ការលើកកម្ពស់គុណភាពនៃការផ្ដល់សេវាសាធា​រណៈ ក៏ដូចជាកែលម្អប្រព័ន្ធអប់រំ កាន់តែមានគុណភាពខ្ពស់ និងការអនុវត្តកម្មវិធីកែទម្រង់ស៊ីជម្រៅ​លើគ្រប់វិស័យ ដែលរាជរដ្ឋាភិបាលបានដាក់ចេញ។ លើសពីនេះទៀត ថវិកាឆ្នាំ២០២២ ក៏ជាថវិកាដែលត្រូវធានាដល់ជោគជ័យនៃការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ ក៏ដូចជាការបំពេញកាតព្វកិច្ចតំបន់និងអន្តរជាតិរបស់កម្ពុជា ពិសេសក្នុងនាមជាប្រធានអាស៊ាននៅឆ្នាំ២០២២។ ក្នុងន័យនេះ ថវិកាឆ្នាំ២០២២ អាចប្រសិទ្ធ​នាមបានថាជា “ថវិកាសម្រាប់បន្តការប្រយុទ្ធប្រឆាំង និងការកសាងសមត្ថភាពរស់នៅជាមួយកូវីដ-​១៩ តាមគន្លងប្រក្រតីថ្មី ដើម្បីបន្តប្រយុទ្ធការពារអាយុជីវិតប្រជាជន រក្សាលំនឹងសង្គម-សេដ្ឋកិច្ច និងជីវភាពរស់នៅរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្ដារនិងជំរុញកំណើនសេដ្ឋកិច្ចឡើងវិញ” ។

គួរបញ្ជាក់ផងដែរថា សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ត្រូវបានរៀបចំឡើងដោយ មាន ៥ជំពូក និង ១៤មាត្រា ហើយត្រូវបានសម្រេចឯកភាពដោយអង្គប្រជុំពេញអង្គគណៈរដ្ឋមន្ត្រី នៅព្រឹកថ្ងៃសុក្រ ១រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែតុលា ឆ្នាំ២០២១ នៅវិមានសន្តិភាព ទីស្ដីការគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕ អរគុណសន្តិភាព