លោក ចូ បៃដិន រងពាក្យបណ្តឹងពីបណ្តារដ្ឋចំនួន ១០ ជុំវិញច្បាប់កាតព្វកិច្ចវ៉ាក់សាំង
វ៉ាស៊ីនតោន៖ អគ្គមេធាវីរដ្ឋចំនួន ១០មកពីគណបក្សសាធារណៈរដ្ឋបានដាក់ពាក្យប្តឹងរដ្ឋបាលរបស់លោកប្រធានាធិបតី ចូ បៃដិន ដើម្បីអោយបញ្ឈប់តម្រូវការបង្ខំបុគ្គលិកសុខាភិបាលអាមេរិករាប់លាននាក់ ចាក់វ៉ាក់សាំងបង្ការជំងឺកូវីដ១៩ ដោយលើកឡើងថា វានឹងធ្វើអោយខ្វះបុគ្គលិកកាន់តែច្រើន។
លោក ចូ បៃដិន របស់គណបក្សប្រជាធិបតេយ្យ បានគូសបញ្ជាក់កាលពីថ្ងៃព្រហស្បតិ៍សប្តាហ៍មុនថា លោកនឹងអោយអនុវត្តច្បាប់ចាក់វ៉ាក់សាំងចាប់ពីថ្ងៃទី៤ ខែមករា ឆ្នាំ២០២២ខាងមុខនេះ។ ពាក្យបណ្តឹងនេះបានលើកឡើងថា ច្បាប់វ៉ាក់សាំងរបស់រដ្ឋាភិបាលសហព័ន្ធបានរំលោភលើអំណាចរបស់ប៉ូលិសរដ្ឋ និងខុសនឹងច្បាប់និតិវិធីរដ្ឋបាល ពីព្រោះមិនមានពេលវេលាសម្រាប់ការបញ្ចេញមតិមុនឡើយ ប៉ុន្តែច្បាប់នោះត្រូវបានចេញផ្សាយតែម្តង។ អ្នកផ្តល់សេវាសុខាភិបាលដែលមិនបានគោរពតាមច្បាប់នេះ អាចនឹងបាត់បង់សិទ្ធិចូលប្រើមូលនិធិ Medicare និង Medicaid។ Medicare គឺជាសេវាបម្រើមនុស្សអាយុ ៦៥ឆ្នាំឡើង និងជនពិការ ហើយ Medicaid ជាសេវាបម្រើជនក្រីក្រ។
សូមបញ្ជាក់ថា កាលពីថ្ងៃទី៤ ខែវិច្ឆិកាកន្លងទៅ មជ្ឈមណ្ឌលសេវាថែទាំសុខភាព Medicare និង Medicaid (CMS) ដែលជានិយតករសម្រាប់កម្មវិធីសុខភាពសហព័ន្ធទាំងពីរបានចេញច្បាប់ចុងក្រោយបណ្តោះអាសន្ន ដោយច្បាប់នេះបានបញ្ជាក់ថា គ្របដណ្តប់លើបុគ្គលិកពេទ្យជាង១០លាននាក់ និងអនុវត្តលើអ្នកផ្តល់សេវាសុខាភិបាលប្រមាណ៧ម៉ឺន៦ពាន់កន្លែង ក្នុងនោះមានទាំងមន្ទីរពេទ្យ ពេទ្យបើកតាមផ្ទះ និងមជ្ឈមណ្ឌលលាងឈាម។ ច្បាប់ចុងក្រោយបណ្តោះអាសន្នមានប្រសិទ្ធភាពភ្លាមៗ ដោយគ្មានទុកពេលវេលា ដើម្បីបញ្ចេញមតិស្របតាមស្តង់ដារឡើយ បន្ទាប់ពីបោះពុម្ពផ្សាយ៕ ប្រភព៖ CGTN
