ដើម្បីចូលរួមចំណែកកាត់បន្ថយអត្រាស្លាប់របួសពិការដោយសារគ្រោះថ្នាក់ចរាចរណ៍សាខាកាកបាទក្រហកម្ពុជា ខេត្តបាត់ដំបងបានប្រារព្វពិធី យុទ្ធនាការផ្សព្វផ្សាយចរាចណ៍ផ្លូវគោក ក្នុងឱកាសព្រះរាជពិធីបុណ្យអុំទូកបណ្តែតប្រទីប សំពះព្រះខែ និងអកអំបុក ឆ្នាំ២០២១
ខេត្តបាត់ដំបង៖ នៅព្រឹកថ្ងៃទី១៩ ខែ វិច្ឆិកា ឆ្នាំ២០២១ ក្នុងឱកាសពិធីបុណ្យអុំទូក បណ្តែតប្រទីប សំពះព្រះខែ និងអកអំបុកនេះ សាខាកាកបាទក្រហមកម្ពុជា ខេត្តបាត់ដំបង បានធ្វើយុទ្ធនាការសុវត្ថិភាពចរាចរណ៍ ក្រោមអធិបតីភាព លោកជំទាវ សោម សេរីវឌ្ឍន៍ នាយិកា នាយកដ្ឋានធនធានមនុស្ស កាកបាទក្រហមកម្ពុជា ឯកឧត្តមបណ្ឌិត ប៊ុត គឹមស៊ាន អនុប្រធានអចិន្រ្តៃយ៍សាខាតំណាង ឯកឧត្តម សុខ លូ ប្រធានគណៈកម្មាធិការសាខា ដោយមានការចូលរួមពី ឯកឧត្តម លោកជំទាវ សមាជិកគណៈកម្មាធិការសាខា មន្រ្តីសាធារណៈការនឹងដឹកជញ្ជូនខេត្ត ការិយាល័យចរាចណ៍ផ្លូវគោកខេត្ត គ្រូទីប្រឹក្សារ យុវជនកាកបាទក្រហមកម្ពុជា សរុបចំនួន៤៥នាក់ស្រី ៣២នាក់ ។
យុទ្ធនាការនេះក្នុងគោលបំណងដើម្បីផ្សព្វផ្សាយដល់ប្រជាពលរដ្ឋ សិស្ស និស្សិត អាជីវករ និងសាធារណៈជនឱ្យដឹងពីច្បាប់ចរាចរណ៍ផ្លូវគោក ត្រូវពាក់មួកសុវត្ថិភាពឱ្យបានត្រឹមត្រូវគ្រប់ពេលធ្វើដំណើរតាមយានយន្ត បើកបរត្រូវចេះអធ្យាស្រ័យគ្នា មិនបើកបរក្រោមឥទ្ធិពលគ្រឿងស្រវឹង និងបើកបរមិនលើសល្បឿនកំណត់ និងទុកសិទ្ធិអាទិភាពជូនជនពិការពេលប្រើប្រាស់ផ្លូវ ដើម្បីឈានទៅដល់ការកាត់បន្ថយអត្រាស្លាប់ ពិការ និងរបួសដោយសារគ្រោះថ្នាក់ចរាចរណ៍ និងចូលរួមគោរពសិទ្ធិជនពិការ និងវិធានការទប់ស្កាត់ការីករាលដាលនៃជំងឺកូវីដ-១៩ ។
ថ្លែងក្នុងឱកាសនោះ លោកជំទាវ សោម សេរីវឌ្ឍន៍ នាយិកា នាយកដ្ឋានធនធានមនុស្ស កាកបាទក្រហមកម្ពុជា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខការថ្លែងអំណរគុណ និងកោតសរសើរចំពោះថ្នាក់ដឹកនាំ សាខាកាកបាទក្រហមកម្ពុជាខេត្តដែលតែងតែពង្រឹងការងារសហប្រតិបត្តិការជាមួយដៃគូពាក់ព័ន្ធនានា និងពង្រឹងការអនុវត្ត សកម្មភាពក្នុ្ងងន័យរួមចំណែកកាត់បន្ថយអត្រាស្លាប់ របួស និងពិការដោយសារគ្រោះថ្នាក់ចរាចរណ៍ ។
ជាមួយគ្នានោះក្នុងនាម ឯកឧត្តម សុខ លូ ប្រធានគណៈកម្មាធិការសាខាខេត្ត ឯកឧត្តមបណ្ឌិត ប៊ុត គឹមស៊ាន អនុប្រធានអចិន្រ្តៃយ៍សាខា បានសូមជម្រាបជូនថា សាខាកាកបាទក្រហមកម្ពុជា ខេត្តបាត់ដំបង បាននិងកំពុងបំពេញសកកម្មភាពរបស់ខ្លួនដោយអនុលោមតាមទិសអទិភាព៤សំខាន់ៗ របស់កាកបាទក្រហមកម្ពុជា រួមមាន៖ ១-ការគ្រប់គ្រងគ្រោះមហន្តរាយ ២-សុខភាព និងការថែទាំសុខភាពក្នុងសហគមន៍ ៣-លើកកម្ពស់គោលការណ៍គ្រឹះ និងតម្លៃមនុស្សធម៌របស់ចលនា ៤-ការអភិវឌ្ឍស្ថានប័ន និងអភិវឌ្ឍន៍ធនធាន ។
ក្នុងកាលៈទេសៈដែលប្រទេសជាតិបាននិងកំពុងស្ថិតក្រោមការពង្រឹងវិធានការបិទ-ខ្ទប់និងវិធានការរដ្ឋបាលកូវីដ-១៩ ក្នុងនោះការងារពង្រឹងសុវត្ថិភាពចរាចណ៍ផ្លូវគោក ក៏ត្រូវបានយកចិត្តទុកដាក់ជាប្រចាំតាមរយៈនៃការបន្តអនុវត្តវិធានការរឹតបន្តឹងការងាអនុវត្តច្បាប់ស្តីពីចរាចណ៍ផ្លូវគោក យ៉ាងសកម្មរបស់គណៈកម្មការសុវត្ថិភាពចរាចណ៍ផ្លូវគោក ដែលមាន សម្តេចក្រឡាហោម ស ខេង ឧបនាយករដ្ឋមន្រ្តី ក្រសួងមហាផ្ទៃ ជាប្រធាន ។ សាខាខេត្តបានសហការជាមួយទីស្នាក់ការកណ្តាលកាកបាទក្រហមកម្ពុជា មន្ទីរពាក់ពន្ធ អង្គការជាតិ-អន្តរជាតិ រដ្ឋបាលខេត្ត ក្រុងស្រុក បានចូលរួមលើកកម្ពស់ការងារសុវត្តិភាពចរាចណ៍ផ្លូវគោកក្នុងឆ្នាំ២០២១មានការថយចុះគួជាទីមោទនៈ ។
តាមរយៈរបាយការណ៍របស់ការិយាល័យចរាចណ៍ផ្លូវគោកខេត្តបាត់ដំបងរយៈពេល៩ខែឆ្នាំ២០២១នេះ អត្រាគ្រោះថ្នាក់ចរាចណ៍ផ្លូវគោកនៅខេត្តបាត់ដំបងមានការថយចុះ៣៧%ធៀបរយៈពេលដូចគ្នាឆ្នាំ២០២០មានមនុស្សស្លាប់ចំនួន៥២នាក់ថយចុះ១៣នាក់ស្មើ២០% របួសធ្ងន់ចំនួន៨៦នាក់ថយចុះ៥១នាក់ស្មើ៣៧%របួសស្រាលចំនួន៦១នាក់ ថយចុះ៥២នាក់ស្មើ៤៦% ។
មូលហេតុគ្រោះថ្នាក់ចរាចណ៍បណ្តាលមកមកពីបើកបរលើសល្បឿនកំណត់៤៣% ប្រជែងគ្រោះថ្នាក់៧% មិនគោរពសិទ្ធ ២% បត់ឆ្វេង-ស្តាំមិនប្រយ័ត្ន ១៨% មិនប្រកាន់ស្តាំ៣% ស្រវឹង៣% ផ្សេងៗ១១% ក្រុងស្រុកដែលមានករណីគ្រោះថ្នាក់ចរាចណ៍រួមមាន៖ ក្រុងបាត់ដំបង ,ស្រុកថ្មគោល ,ស្រុកមោងឬស្សី ស្រុកសង្កែ, ស្រុកបាណន់,ស្រុកបវេល,ស្រុកភ្នំព្រឹកនិងស្រុកសំពៅលូន។ដូចនេះក្នុងនាមជាជំនួយការឲ្យអាជ្ញាធរសាធារណៈលើវិស័យមនុស្សធម៌យើងនាំគ្នាខំធ្វើសកម្មភាព ផ្សព្វផ្សាយយុទ្ធនាការតាមដងផ្លូវតាមទីសាធារណៈផ្សាយតាមវិទ្យុ-ទូរទស្សន៍ និងបានសហការជាមួយមន្ទីរសាធារណៈការនិងដឹកជញ្ជូនខេត្តការិយាល័យចរាចណ៍ផ្លូវគោកនៃស្នងការនគរបាលខេត្តគ្រឹះស្ថានសិក្សា យុវជនអ្នកស្មគ្រ័ចិត្តនិងអាជ្ញាធរមូលដ្ឋានចុះអប់រំផ្សព្វផ្សាយការងារលើកកម្ពស់សុវត្ថិភាពចរាចណ៍តាមសាលារៀន សហគមន៍ដូចភ្លៀងរលឹម។ ជាលទ្ធផលក្រុមការងារ យុវជនកាកបាទក្រហមកម្ពុជា បានចែកខិតបណ្ណ័ចរាចណ៍ ខិតបណ្ណវិធការទប់ស្កាត់កូវីដ-១៩ ម៉ាស់ ជែល ជូនប្រជាពលរដ្នអ្នកធ្វើដំណើរតាមដងផ្លូវ និងសួរសំនួរចម្លើយទទួលបានមួកសុវត្តិភាពនិងឯកសារមួយចំនួនផងដែរ ៕
