លោកជំទាវកិត្តិសង្គហបណ្ឌិត ម៉ែន សំអន សាទរចំពោះវត្តមាន ឯកឧត្តម ង្វៀន ហ៊ុយតាំង(Nguyen Huy Tang) ឯកអគ្គរដ្ឋទូតវៀតណាមប្រចាំនៅកម្ពុជា ដែលទើបផ្លាស់ថ្មី

ថ្លែងក្នុងឱកាសនោះ លោកជំទាវបាននាំនូវការផ្តាំផ្ញើរសាកសួរសុខទុក្ខពីសំណាក់ សម្តេចតេជោ ជូនដល់ថ្នាក់ដឹកនាំគ្រប់លំដាប់ថ្នាក់នៃប្រទេសវៀតណាម និងបានលើកឡើងអំពីចំណងមិត្តភាព និងកិច្ចសហ​ប្រត្តិបត្តិការនៃប្រទេសទាំងពីរដែលបានជួយគាំទ្រគ្នាទៅវិញទៅមកលើគ្រប់វិស័យតាំងពីអតីតកាលរហូតដល់បច្ចុប្បន្ន ព្រមទាំងបានលើកឡើងអំពីស្នាព្រះហស្ថរបស់ព្រះបរមរតនកោដ្ឋ សម្តេចព្រះនរោត្តមសីហនុ ដែលបានចូលរួមក្នុងការគាំទ្រដល់ប្រជាពលរដ្ឋ និងរដ្ឋាភិបាលក្នុងការរំដោះភាគខាងត្បួងផងដែរ។

លោកជំទាវ ម៉ែន សំអន បានសម្តែងនូវការស្វាគមន៍ និងបានចាត់ទុកបេសកកម្ម របស់ឯកឧត្តម អគ្គរដ្ឋ​ទូត​ថ្មី នាពេលនេះ នឹងបន្តកិច្ចសហប្រតិបត្តិការល្អប្រសើរបន្ថែមទៀត ពិសេសខាងវិស័យនយោបាយការទូត សេដ្ឋកិច្ច ពាណិជ្ជកម្ម ទេសចរណ៍ និងការអភិវឌ្ឍន៍ជិវភាពរស់នៅរបស់ប្រជាជននៅតាមព្រំដែន តាមរយៈនៃការសង្ឃឹមទុកថា នឹងមានការបើកព្រំដែនប្រទេសទាំងពីរឡើងវិញ ប្រសិនបើបញ្ហាជំងឺ​កូវីដ.​១៩ នឹងថមថយ តាមរយៈការគ្រប់គ្រង ការពារ ការរីករាលដាល ។

ឯកឧត្តម ង្វៀន ហ៊ុយតាំង (Nguyen Huy Tang) បានសំដែងការចាប់អារម្មណ៍ចំពោះការរីកចំរើននៅកម្ពុជានាពេលបច្ចុប្បន្ន បើប្រៀបទៅនឹងប្រទេសជាតិបានរំដោះចេញពីរបប ប៉ុល ពត នាថ្ងៃរំដោះ៧ មករា ១៩៧៩ គឺមានភាពខុសគ្នាដាច់ស្រឡះ ព្រោះឯកឧត្តម ក៏ជាសាក្សីមួយរូបដែលធ្លាប់បានមកដល់កម្ពុជាកាលពីឆ្នាំ១៩៨០ ។

ជាពិសេស ជាងនេះទៅទៀតនោះ ឯកឧត្តម ង្វៀន ហ៊ុយតាំង (Nguyen Huy Tang) បានកោតសរសើរចំពោះការគិតគូររបស់សម្តេចតេជោ ហ៊ុន សែន ក្នុងការ ការពារទប់ស្កាត់ជំងឺកូវីដ១៩ តាមរយៈ ការដាក់ចេញនូវយុទ្ធសាស្ត្រចាក់វ៉ាក់សាំង ឬការស្រោចវ៉ាក់សាំងជូនដល់ប្រជាជនកម្ពុជារហូតសម្រេចជិត ១០០​ភាគរយ នៃចំនួនប្រជាជនសរុប ដែលជាកត្តាជោគជ័យមួយមិនត្រឹមកម្ពុជាខ្លួនឯងទេ គឺបានចែករំលែកជាបទពិសោធន៍ដល់ប្រទេសនានានៅលើសកលលោក ក៏ដូចជាការផ្តល់វ៉ាក់សាំងមួយចំនួនជួយដល់ប្រជាជនវៀតណាម និងប្រទេសជិតខាងទៀតផង ដែលនេះជាសេចក្តីសង្ឃឹមទុកមួយដ៏ធំធេងក្នុងបើកប្រទេសឲ្យដំណើរការឡើងវិញ នឹងឈានទៅដល់ការបើកច្រកព្រំដែនរវាងកម្ពុជា វៀតណាមផងដែរ ។

ជាការឆ្លើយតប លោកជំទាវកិត្តិសង្គហបណ្ឌិត ម៉ែន សំអន បានថ្លែងនូវមោទនភាពមួយ ដែលរដ្ឋាភិបាល​វៀតណាម បានចាត់តាំងឲ្យឯកឧត្តម មកបំពេញបេសកកម្មការទូតនៅកម្ពុជា ដែលជាសាក្សីមួយរូបបានដឹង និងបានឃើញផ្ទាល់ក្នុងគ្រាប្រទេសកម្ពុជា បានចាប់ផ្តើមចេញពីចំណុចសូន្យរហូតដល់មានសមិទ្ធិផលដ៏ធំធេងនាពេលនេះ ដែលកើតចេញពីការខិតខំតស៊ូគ្រប់យ៉ាងរបស់សម្តេចតេជោ ហ៊ុន សែន ដែលបាន​យក​អាយុជីវិត ទៅប្តូរដើម្បីភាពរស់ឡើងវិញរបស់ប្រជាជន និងប្រទេសកម្ពុជា ។

ជាចុងបញ្ចប់ លោកជំទាវកិត្តិសង្គហបណ្ឌិត ម៉ែន សំអន មានប្រសាសន៍ថា ក្នុងនាមប្រមុខដឹកនាំរាជរដ្ឋា​ភិបាលកម្ពុជា នឹងចូលរួមសហការជាមួយឯកឧត្តម ឯកអគ្គរដ្ឋទូត នៅក្នុងបេសកកម្មការទូតនៅកម្ពុជាឲ្យទទួលបានជោគជ័យ៕ អរគុណសន្តិភាព