រដ្ឋអាជ្ញាហូឡង់អំពាវនាវឱ្យកាត់ទោសដាក់ពន្ធនាគារអស់ ១ ជីវិត ជុំវិញការបាញ់ទម្លាក់យន្តហោះម៉ាឡេស៊ី MH17

ចេញផ្សាយ ថ្ងៃទី 25 ខែ ធ្នូ ឆ្នាំ 2021

ទីភ្នាក់ងារព័ត៌មានរ៉យទ័ររាយការណ៍ថា រដ្ឋអាជ្ញាហូឡង់កំពុងអំពាវនាវឱ្យមានការកាត់ទោសដោយដាក់ពន្ធនាគារអស់ ១ ជីវិតចំពោះជនជាតិរុស្ស៊ីចំនួន ៣ នាក់ និងជនជាតិអ៊ុយក្រែនម្នាក់ដែលរងការចោទប្រកាន់ពីបទមនុស្សឃាតជុំវិញការធ្លាក់យន្តហោះ MH17 របស់ម៉ាឡេស៊ីដែលសម្លាប់មនុស្សចំនួន ២៩៨ នាក់កាលពីឆ្នាំ ២០១៤។

តាមរយៈការអំពាវនាវកាលពីថ្ងៃពុធ លោករដ្ឋអាជ្ញា Manon Ridderbeks និយាយថា ជនជាប់ចោទ ៤ នាក់ រួមមានលោក Igor Girkin លោក Sergey Dubinsky លោក Oleg Pulatov និងលោក Leonid Kharchenko មានទំនាក់ទំនងជាមួយក្រុមឧទ្ទាមគាំទ្រដោយរុស្ស៊ីនៅភាគខាងកើតអ៊ុយក្រែន ហើយដើរតួយ៉ាងសំខាន់ក្នុងព្រឹត្តិការណ៍ធ្លាក់យន្តហោះ។

ក្រុមអ្នកស៊ើបអង្កេតអន្តរជាតិមួយក្រុមសន្និដ្ឋាននៅក្នុងខែឧសភា ឆ្នាំ ២០១៨ ថា បុរសទាំង ៤ នាក់ មានឧបករណ៍បាញ់បង្ហោះដែលជាកម្មសិទ្ធិរបស់កងពលតូចមីស៊ីលប្រឆាំងយន្តហោះទី៥៣ របស់រុស្ស៊ីដែលប្រើដើម្បីបាញ់ទម្លាក់យន្តហោះ MH17 ដែលកំពុងធ្វើដំណើរពីរដ្ឋធានីអាំស្ទ៊ែរដាំទៅកាន់រដ្ឋធានីគូឡាឡាំពួ។

ព្រះរាជអាជ្ញាបន្ថែមថា ក្រុមនេះ [ជនជាប់ចោទ]ធ្វើការរួមគ្នាដើម្បីទទួលបានមីស៊ីល Buk ពីរុស្ស៊ីទៅកាន់ភាគខាងកើតអ៊ុយក្រែន ដើម្បីពង្រឹងក្រុមបំបែកខ្លួន ដែលបាញ់មីស៊ីលលើ MH17 ដោយគិតថា វាជាយន្តហោះយោធាអ៊ុយក្រែនក្នុងឆ្នាំ ២០១៤។

ជនជាប់ចោទទាំង ៤ នាក់ បដិសេធការជាប់ពាក់ព័ន្ធក្នុងឧបទ្ទវហេតុនេះ ដោយលោក Dubinsky ប្រាប់ប្រព័ន្ធផ្សព្វផ្សាយហូឡង់ថា ការស្នើសុំការកាត់ទោស ១ ជីវិតពីព្រះរាជអាជ្ញា គឺអាចទស្សន៍ទាយបានទាំងស្រុង។ លោកនិយាយថា៖ «កំហុសរបស់យើងត្រូវបានកំណត់រួចហើយ»។

លោក Pulatov ដែលជាចុងចោទម្នាក់ទៀតក្នុងសំណុំរឿងបានបញ្ជូនមេធាវីឱ្យតំណាងលោកក្នុងសំណុំរឿងនេះ ខណៈដែលចុងចោទផ្សេងទៀតមិនបានសហការ និងកំពុងរងការកាត់ទោសដោយកំបាំងមុខ៕BY The Phnom Penh Post.