ឯកឧត្តមអភិបាលខេត្តតាកែវ និងលោកជំទាវ អញ្ជើញចូលរួមឆ្លងពិធីបុណ្យឆ្លងភ្នំបុណ្យ និងរូបបដិមាមេទ័ពគិរី ព្រមទាំងរាប់បាត ព្រះសង្ឃ ១១៩អង្គ នៅវត្តលឹមពូលសាមគ្យារាម ហៅ (វត្តធម្មយុត្តិ)
ខេត្តតាកែវ៖ នៅព្រឹកថ្ងៃសៅរ៍ ទី១៩ ខែកុម្ភៈ ឆ្នាំ២០២២នេះ ឯកឧត្តម អ៊ូច ភា អភិបាល នៃគណៈអភិបាល ខេត្តតាកែវ និងលោកជំទាវ ស្រី ប៉ុណ្ណាដាវី ព្រមទាំង លោក លោកស្រី អភិបាលរងខេត្ត ឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងទាំង៣ និងពុទ្ធបរិស័ទ្ធជិតឆ្ងាយទាំងអស់ បានអញ្ជើញចូលរួមពិធីបុណ្យឆ្លងភ្នំបុណ្យ និងរូប បដិមាមេទ័ពគិរី ព្រមទាំងរាប់បាតព្រះសង្ឃ ១១៩អង្គ ដែលបានប្រារព្ធធ្វើឡើងនៅវត្ត លឹមពូលសាម គ្យារាម ហៅ (វត្តធម្មយុត្តិ) ស្ថិតនៅភូមិឡូរី សង្កាត់រកាក្នុង ក្រុងដូនកែវ ខេត្តតាកែវ។
ឆ្លៀតក្នុងឱកាសនោះដែរ ឯកឧត្តម អ៊ូច ភា អភិបាលខេត្តតាកែវ បានមានប្រសាសន៍ថា រដ្ឋបាលខេត្ត តាកែវ នឹងរៀបចំយុទ្ធនាការ ចាក់វ៉ាក់សាំងការពារជំងឺកូវីដ១៩ ជូនដល់កុមារដែលមានអាយុចាប់ពី៣ឆ្នាំ ទៅដល់អាយុ៥ឆ្នាំ នៅថ្ងៃច័ន្ទទី២១ ខែកុម្ភៈខាងមុខនេះតទៅ នៅតាមមន្ទីរពេទ្យរដ្ឋ មណ្ឌលសុខភាព ដែលខេត្តរៀបចំ ហើយក្នុងនោះ សូមបងប្អូនទាំងអស់គ្នា បញ្ជូនកូនរបស់ខ្លួនមកចាក់វ៉ាក់សាំងការពារជំងឺ កូវីដ១៩នេះ កុំបីខាន ដើម្បីយើងទាំងអស់គ្នាចូលរួមប្រយុទ្ធប្រឆាំង នឹងជំងឺកូវីដ១៩នេះ កុំឱ្យឆ្លងបន្ត ចូលនៅក្នុងសហគមន៍របស់យើង។
ឯកឧត្តមអភិបាលខេត្តតាកែវ បន្តទៀតថា រាជរដ្ឋាភិបាលកម្ពុជា ក្រោមការដឹកនាំសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា លោកបានខិតខំយកចិត្តទុកដាក់ស្វះស្វែងរកវ៉ាក់សាំង មកចាក់ជូនបងប្អូន ប្រជាពលរដ្ឋកម្ពុជាទាំងអស់ ដោយឥតគិតថ្លៃអ្វីឡើយ ហើយឥលូវនេះគឺលោកបានតម្រូវឱ្យចាក់ជូនដល់កុមារអាយុចាប់ពី៣ឆ្នាំឡើងទៅ ដែលនេះជាការគិតគូរខ្ពស់អំពីសុខទុក្ខ និងសុខភាពរបស់បងប្អូន ប្រជាពលរដ្ឋគ្រប់ស្រទាប់វណ្ណៈ។
ឯកឧត្តម អ៊ូច ភា បន្ថែមទៀតថា សម្តេចតេជោ លោកមិនទុកឱ្យបងប្អូនប្រជាពលរដ្ឋណាម្នាក់ ខ្វះវ៉ាក់ សាំងចាក់ជូនឡើយ ពោលគឺមានវ៉ាក់សាំងគ្រប់គ្រាន់ ដើម្បីចាក់ជូនបងប្អូនប្រជាពលរដ្ឋ ឱ្យបានគ្រប់ៗគ្នា និងវ៉ាក់សាំងដូសជំរុញផងដែរ ដូច្នោះសូមបងប្អូនប្រជាពលរដ្ឋទាំងអស់គ្នា សូមអញ្ជើញមកចាក់វ៉ាក់សាំង ដូសជម្រុញ ដូសទី០៣ និងដូសទី០៤ ឱ្យបានគ្រប់គ្នា ហើយបន្តរួមគ្នាចូលរួមអនុវត្តនូវវិធានការនានា របស់ក្រសួងសុខាភិបាល ពិសេសអនុវត្ត៣កុំ៣ការពារឱ្យបានត្រឹមត្រូវដើម្បីសហគមន៍យើង និងប្រទេស របស់យើង គ្មានការឆ្លងនូវជំងឺកូវីដ១៩ដ៏ចង្រៃមួយនេះតទៅទៀត៕ អរគុណសន្តិភាព
