សម្ដេចក្រឡាហោម ស ខេង ឧបនាករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតជូនលោក Benoit Bosquet ប្រធានប្រចាំតំបន់នៃគម្រោងការអនុវត្តជាសកលនូវការអភិវឌ្ឍប្រកបដោយចីរភាពសម្រាប់អាស៊ីខាងកើត និងប៉ាស៊ីហ្វិក នៃធានាគារពិភពលោក ជួបពិភាក្សាការងារ តាមប្រព័ន្ធបញ្ជូនរូបភាព និងសំឡេង
ភ្នំពេញ៖ នៅរសៀលថ្ងៃអង្គារ ៥រោច ខែផល្គុន ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី២២ ខែមីនា ឆ្នាំ២០២២ សម្ដេចក្រឡាហោម ស ខេង ឧបនាករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតជូនលោក Benoit Bosquet ប្រធានប្រចាំតំបន់នៃគម្រោងការអនុវត្តជាសកលនូវការអភិវឌ្ឍប្រកបដោយចីរភាពសម្រាប់អាស៊ីខាងកើត និងប៉ាស៊ីហ្វិក នៃធានាគារពិភពលោក ជួបពិភាក្សាការងារ តាមប្រព័ន្ធបញ្ជូនរូបភាព និងសំឡេង។
ជាកិច្ចចាប់ផ្ដើមសម្ដេចក្រឡាហោម ស ខេង ឧបនាយករដ្ឋមន្ត្រី បានសម្ដែងការស្វាគមន៍លោក Benoit Bosquet និងសហការី និងបានយកឱកាសនេះថ្លែងអំណរគុណធនាគារពិភពលោក ដែលបានជួយគាំទ្រដល់គម្រោងសំខាន់ៗមួយចំនួនដែលស្ថិតក្រោមសមត្ថកិច្ចទទួលខុសត្រូវរបស់ក្រសួងមហាផ្ទៃ ដូចជា គម្រោងគណនេយ្យភាពសង្គម គម្រោងលើកកម្ពស់ជីវភាពប្រជាជនក្រីក្រ និងគម្រោងគ្រប់គ្រងសំណល់រឹង។
សម្ដេចក្រឡាហោម បានមានប្រសាសន៍ថា ការគាំទ្រតាមរយៈគម្រោងសំខាន់ៗទាំង៣ ពីសំណាក់ធនាគារពិភពលោក ពិតជាបានរួមចំណែកដល់ការអភិវឌ្ឍជីវភាពរស់នៅរបស់ប្រជាពលរដ្ឋនៅមូលដ្ឋាន និងចូលរួមចំណែកកាត់បន្ថយភាពក្រីក្រចំពោះប្រជាពលរដ្ឋដែលស្ថិតក្នុងតំបន់គោលដៅនៃការអនុវត្តគម្រោងទាំងនោះ។
លោក Benoit Bosquet ក៏បានសម្ដែងការគាំទ្រចំពោះប្រសាសន៍លើកឡើងរបស់សម្ដេចក្រឡាហោម និងបានជម្រាបសម្ដេចថា នេះគឺជាមូលហេតុដែលលោកមានបំណងជួបពិភាក្សាការងារជាមួយសម្ដេច និងក្រុមការងារដែលទទួលបន្ទុកការងារនេះ ទាំងអំពីគម្រោងគណនេយ្យភាពសង្គម ការលើកកម្ពស់ជីវភាពប្រជាជនក្រីក្រ និងគម្រោងគ្រប់គ្រងសំណល់រឹង។
លោក Benoit Bosquet ក៏បានជម្រាបសម្ដេចក្រឡាហោមអំពីអត្ថប្រយោជន៍ដែលគម្រោងទាំងនេះបានផ្ដល់ជូនប្រជាពលរដ្ឋក្នុងមូលដ្ឋានដែលជាគោលដៅនៃការអនុវត្តគម្រោង ដោយលោកបានមានប្រសាសន៍ថា ធានាគារពិភពលោកនៅតែបង្ហាញការប្ដេជ្ញាចិត្តក្នុងការរួមចំណែក តាមរយៈការអនុវត្តគម្រោងបែបនេះ សំដៅធ្វើយ៉ាងណាចូលរួមចំណែកលើកម្ពស់ជីវភាពរស់នៅរបស់ប្រជាពលរដ្ឋ។
លោកក៏បានជម្រាបជូនសម្ដេចក្រឡាហោម និងមន្រ្តីពាក់ព័ន្ធកម្ពុជាដែរថា ទន្ទឹមនឹងការអនុវត្តគម្រោងទាំងនេះ ក៏នៅមានកិច្ចការមួយចំនួនទៀតដែលភាគីទាំងពីរត្រូវបន្តជជែកពិភាក្សាគ្នាបន្ថែមទៀតលើកិច្ចការដែលពាក់ព័ន្ធនឹងគម្រោងទាំង៣ សំដៅធ្វើយ៉ាងណារក្សានិរន្តរភាពនៃការអនុវត្តគម្រោងទាំងនេះ ដើម្បីបំរើដល់ផលប្រយោជន៍ប្រជាពលរដ្ឋបន្តទៅមុខទៀត។
លោកក៏បានថ្លែងអំណរគុណ និងវាយតម្លៃខ្ពស់ចំពោះតួនាទីក្រសួងមហាផ្ទៃ ដែលបានសហការអនុវត្ត និងដំណើរការគម្រោងសំខាន់ៗដូចបានលើកឡើងខាងលើ។
សម្ដេចក្រឡាហោម ក៏បានថ្លែងអំណរគុណលោក Benoit Bosquet និងគណៈប្រតិភូធនាគារពិភពលោក ហើយថាសម្ដេច ព្រមទាំងសហការី ត្រៀមជានិច្ចក្នុងការជជែកពិភាក្សាជាមួយភាគីធនាគារពិភពលោក ដើម្បីធនាបាននិរន្តរភាពនៃគម្រោងសំខាន់ៗទាំងនេះ សំដៅបម្រើដល់ផលប្រយោជន៍ប្រជាពលរដ្ឋ។
តាមរយៈបទពិសោធន៍ផ្ទាល់ សម្ដេចក៏បានគូសបញ្ជាក់អំពីការជួបប្រាស្រ័យជាមួយប្រជាពលរដ្ឋនៅតាមមូលដ្ឋានដែលជាគោលដៅនៃការអនុវត្តគម្រោងទាំងនេះ ដោយសម្ដេចសង្កេតឃើញការគាំទ្ររបស់ប្រជាពលរដ្ឋដែលបានទទួលអត្ថប្រយោជន៍ពីគម្រោងទាំងនេះ។
ដូច្នេះសម្ដេចលើកទឹកចិត្តឱ្យភាគីពាក់ព័ន្ធបន្តការពិភាក្សា សំដៅធ្វើយ៉ាងណាទទួលបាននូវការគាំទ្របន្ថែមទៀតពីសំណាក់ធនាគារពិភពលោក ដើម្បីឱ្យគម្រោងសំខាន់ៗទាំងនេះបន្តនិរន្តរភាពសម្រាប់បំរើផលប្រយោជន៍ប្រជាជន៕ អរគុណសន្តិភាព
