ក្រុមស្រ្តីជាបុគ្គលិកណាហ្គាវើលដ៍ ប្រើហិង្សាលើអាជ្ញាធរឲ្យមានរបួស

ភ្នំពេញ៖ អ្នកនាំពាក្យរដ្ឋបាលរាជធានីភ្នំពេញ បានបកស្រាយដល់សាធារណជនថា ក្រុមបុគ្គលិកណាហ្គា​វើលដ៍ បានជេរប្រមាថ តិះដៀល និងប្រើកាយវិការអសីលធម៌បំផុត ដែលមិនស័ក្តិសមជានារីខ្មែរ រហូត​ឈានដល់ប្រើហិង្សា បង្ករបួសស្នាម លើអាជ្ញាធរមានសមត្ថកិច្ច ក្នុងការតវ៉ារបស់ពួកគេ កាលពីថ្ងៃទី២៣ ខែមីនា ឆ្នាំ២០២២។

ការដែលបុគ្គលិកណាហ្គាវើលដ៍ ផ្តល់ព័ត៌មានទៅសាធារណជនថា អាជ្ញាធរបានប្រើអំពីហិង្សាលើពួកគេ គឺមិនមែនជាការពិតឡើយ។

អាជ្ញាធរ បានអញ្ជើញពួកគេឡើងរថយន្ត ដើម្បីដឹកទៅជួបជុំគ្នានៅទីលានប្រជាធិបតេយ្យ តែពួកគេបែរជា​ចោទអាជ្ញាធរថា ប្រើហិង្សាលើពួកគេទៅវិញ។

អ្នកនាំពាក្យរដ្ឋបាលរាជធានីភ្នំពេញ បានលើកចំណុចល្អរបស់អាជ្ញាធរថា អាជ្ញាធរ បានអប់រំបុគ្គលិក​ណា​ហ្គា​វើលដ៍ជាច្រើនលើកច្រើនសា ដើម្បីឲ្យពួកគេពិចារណា និងភ្ញាក់រឭក តែពួកគេ កាន់តែបន្តធ្វើសកម្មភាព រហូតដល់សម្តែងធ្វើជាជនរងគ្រោះ តាមរូបភាពផ្សេងៗ។

អ្នកនាំពាក្យ អះអាងថា ពួកគេ ធ្វើសកម្មភាពទៅតាមសេណារីយោរៀបចំរបស់អ្នកដឹកនាំពីក្រោយខ្នង ក្នុងគោលបំណងកេងចំណេញផលប្រយោជន៍អ្វីមួយ។

អ្នកនាំពាក្យរដ្ឋបាលរាជធានីភ្នំពេញ អត្ថាធិប្បាយទៀតថា បុគ្គលិកណាហ្គាវើលដ៍ ប្រើពាក្យអសុរោះ និងកាយវិការមិនសមរម្យដាក់អាជ្ញាធរ ដើម្បីបញ្ឆេះកំហឹងអាជ្ញាធរ ហើយពួកគេ ត្រៀមចាំថតរូបភាពផ្សេងៗ សម្រាប់ទុកចោទប្រកាន់អាជ្ញាធរ។

អ្នកនាំពាក្យ បញ្ជាក់ថា ដោយមានការអត់ធ្មត់ អាជ្ញាធរមិនធ្លាក់ចូលក្នុងឧបាយកលរបស់ពួកគេឡើយ៕ អរគុណសន្តិភាព