អគ្គីភ័យបង្កឆេះឃ្លាំងស្តុកខ្សែភ្លើង របស់រោងចក្រអគ្គីសនីជប៉ុន អស់ជាច្រើនដុំ សង្ស័យបណ្តាលមកពីការដុតសំរាម

ខេត្តសៀមរាប៖ ខ្សែភ្លើងធំៗជាច្រើនដុំ ត្រូវបានអគ្គីភ័យឆាបឆេះ នារសៀលថ្ងៃទី១៥ ខែមេសា ឆ្នាំ២០២២​នេះ នៅចំណុចឃ្លាំងស្តុកខ្សែភ្លេីអគ្គីសនី ក្នុងរោងចក្រអគ្គិសនីជប៉ុនស្ថិតនៅក្រុមទី៧ ភូមិខ្នារ សង្កាត់ជ្រាវ ក្រុងសៀមរាប។

យោងតាមរបាយការណ៍របស់អាវុធហត្ថក្រុងសៀមរាប បានឲ្យដឹងថា បន្ទាប់ពីទទួលបានសេចក្តីរាយការណ៍របស់ប្រជាពលរដ្ឋ កម្លាំងសមត្ថកិច្ច បានចុះទៅអន្តរាគមន៍បន្ទាន់ ដោយប្រើប្រាស់រថយន្តពន្លត់អគ្គីភ័យចំនួន ៧គ្រឿង ក្នុងនោះមានរថយន្តពន្លត់អគ្គីភ័យកងរាជអាវុធហត្ថចំនួន ២គ្រឿង, រថយន្តអគ្គីភ័យពន្លត់របស់អាជ្ញាធរជាតិអប្សរាចំនួន ២គ្រឿង និងរថយន្តអគ្គីភ័យពន្លត់ របស់នគរបាលខេត្ត ៣គ្រឿង។

របាយការណ៍ខាងលើបន្តថា បន្ទាប់ពីអន្តរាគមន៍អស់រយ:ពេលជិត២ម៉ោង ភ្លើងត្រូវបានរលត់ទាំងស្រុងនៅវេលាម៉ោង១៥ និង៣០នាទី ដោយពុំបណ្តាលឲ្យមានរបួស និងស្លាប់មនុស្ស រឺសត្វឡេីយ ហើយក៏មិនបង្កទៅទៅដល់លំនៅឋានប្រជាពលរដ្ឋ ក្បែរៗនោះដែរ ដោយសារ ក្នុងបរិវេណមានរបងព័ទ្ធជុំវិញ។

ចំពោះមូលហេតុ ដែលនាំឲ្យមានអគ្គីភ័យនេះ កម្លាំងសមត្ថកិច្ចបានសន្និដ្ឋានជំហានដំបូងថា អាចបណ្តាលមកពីមានប្រជាពលរដ្ឋដុតសំរាម នៅក្រៅរបង ហើយធ្លាក់ផ្កាភ្លើងមកចំដុំរមូខ្សែភ្លើង ក៏បណ្តាលឲ្យឆាបឆេះ​តែម្តង។

បើទោះយ៉ាងណាក្តី ចំពោះទំហំខូតខាតគេនៅមិនទាន់ប៉ាន់ស្មានបាននៅឡើយទេ៕ ប្រភពមន្ទីរព័ត៌មានខេត្តសៀមរាប