ចាប់មុខសញ្ញា ចោរដៃមឹក ជិះម៉ូតូកាច់កញ្ចក់រថយន្តប្រជាពលរដ្ឋ នៅរាជធានីភ្នំពេញ

ភ្នំពេញ៖ ជនសង្ស័យឈ្មោះ វង្ស ចាន់សុភ័ក្រ ហៅ ម៉ាប់ គឺ ជាមុខសញ្ញាចោរដៃមឹក ជិះម៉ូតូកាច់កញ្ចក់រថយន្តប្រជាពលរដ្ឋ នៅរាជធានីភ្នំពេញ ពេលនេះ ត្រូវបាននគរបាលខណ្ឌឫស្សីកែវ ឃាត់ខ្លួនបានហើយ ក្រោយទទួលពាក្យបណ្តឹងពីជនរងគ្រោះ ។

តាមប្រភពព័ត៌មានដែលយើងទទួលបាននៅថ្ងៃទី១៩ ខែមេសា ឆ្នាំ២០២២នេះ បានឲ្យដឹងថា ជនសង្ស័យរូបនេះ បានធ្វើសកម្មភាពជិះម៉ូតូកាច់កញ្ចក់ឡានមួយគ្រឿងម៉ាក Ford Rapper អស់មួយគូ កាលពីថ្ងៃទី១៥ ខែមេសា ឆ្នាំ២០២២ នៅចំណុចផ្ទះលេខ១១៦ឃ ផ្លូវបេតុង ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ ។

ក្រោយមក ជនរងគ្រោះឈ្មោះ តាន់ ប៊ុនសួរ ក៏បានដាក់ពាក្យបណ្តឹង ដោយភ្ជាប់ជាមួយរូបភាពតាមកាមេរ៉ាសុវត្ថិភាពផងដែរ ទើបដល់ថ្ងៃទី១៧ ខែមេសា ឆ្នាំ២០២២ នគរបាលខណ្ឌឫស្សីកែវ បានស្រាវជ្រាវឈានដល់ការឃាត់ខ្លួនជនសង្ស័យបានតែម្តង ។

នៅដំណាក់កាលសមត្ថកិច្ច ជនសង្ស័យបានសារភាពថា ខ្លួនពិតជាបានប្រព្រឹត្តបទល្មើសកាច់កញ្ចក់រថយន្តរបស់ប្រជាពលរដ្ឋ ប្រាកដមែន ។

បច្ចុប្បន្ននេះសមត្ថកិច្ចកំពុងកសាងសំណុំរឿងបញ្ជូនជនសង្ស័យទៅតុលាការ ដើម្បីចាត់ការតាមផ្លូវច្បាប់ ។

ជាការកត់សម្គាល់ មួយរយៈពេលចុងក្រោយនេះ បទល្មើសកាច់កញ្ចក់រថយន្តរបស់ប្រជាពលរដ្ឋ ហាក់កក្រើកឡើងវិញ ដែលធ្វើអោយប្រជាពលរដ្ឋ បារម្ភជាខ្លាំងអំពីសុវត្ថិភាពក្នុងការរស់នៅ ដោយសង្ឃឹមថា សមត្ថកិច្ចពាក់ព័ន្ធនឹងបន្តពង្រឹងសន្តិសុខបន្ថែមទៀត ដើម្បីសេចក្តីសុខរបស់ប្រជាពលរដ្ឋ ៕ by

Hout Songhak