ឯកឧត្តម សាយ សំអាល់ ដឹកនាំគណៈប្រតិភូក្រសួងបរិស្ថាន ដាក់កម្រងផ្កា និងគោរពវិញ្ញាណក្ខន្ធសព សម្តេច ឧត្តមទេពញាណ ហ៊ុន ណេង
ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន នារសៀលថ្ងៃទី៧ ខែឧសភា ឆ្នាំ២០២២ បានដឹកនាំគណៈប្រតិភូចូលរួមដាក់កម្រងផ្កា រំលែកមរណទុក្ខដ៏ក្រៀមក្រំបំផុត និងគោរពវិញ្ញាណក្ខន្ធសព សម្តេច ឧត្តមទេពញាណ ហ៊ុន ណេង ប្រធានគណៈកម្មការទី៤ នៃរដ្ឋសភា អ្នកតំណាងរាស្ត្រមណ្ឌលខេត្តកំពង់ចាម និងជាប្រធានកិត្តិយសសាខាកាកបាទក្រហមកម្ពុជា ខេត្តកំពង់ចាម ដែលបានទទួលមរណភាពដោយជំងឺបេះដូង កាលពីវេលាម៉ោង ៦:២៥នាទីល្ងាច ថ្ងៃព្រហស្បតិ៍ ៥កេីត ខែពិសាខ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី ៥ ខែឧសភា ឆ្នាំ២០២២ ក្នុងជន្មាយុ ៧២ឆ្នាំ។
ពិធីបុណ្យសពប្រព្រឹត្តទៅនៅគេហដ្ឋានស្ថិតនៅភូមិទី៧ សង្កាត់កំពង់ចាម ក្រុងកំពង់ចាម ខេត្តកំពង់ចាម។
ស្ថិតក្នុងសមានទុក្ខដ៏ក្រៀមក្រំនេះ ឯកឧត្តម សាយ សំអាល់ បានសម្តែងនូវការចូលរួមរំលែកទុក្ខដ៏ក្រៀមក្រំ និងសោកស្តាយជាពន់ពេកចំពោះមរណភាពរបស់ ឯកឧត្តមព្រឹទ្ធាចារ្យ ដែលមរណភាពនេះ គឺជាការបាត់បង់នូវស្វាមី បង បងថ្លៃ ឪពុក ឪពុកក្មេក និងជីតា ដ៏ឧត្តុង្គឧត្តម ប្រកបដោយព្រហ្មវិហារធម៌ ជាកុលបុត្រដ៏ល្អប្រពៃ ជាឥស្សរជន និងជាថ្នាក់ដឹកនាំជាន់ខ្ពស់មួយរូប ធ្លាប់បានដឹកនាំ គ្រប់គ្រងមន្ត្រីបានយ៉ាងល្អ បានធ្វើពលិកម្មគ្រប់បែបយ៉ាង មានស្នាដៃជាច្រើន មានក្ដីស្រឡាញ់ពី មហាជន រួមចំណែកនាំមកនូវសុខសន្តិភាព និងការអភិវឌ្ឍសង្គមជាតិ ដើម្បីបុព្វហេតុបម្រើជាតិ សាសនា និងព្រះមហាក្សត្រ។
ថ្នាក់ដឹកនាំនិងមន្រ្តីរាជការនៃក្រសួងបរិស្ថានទាំងអស់ សូមឧទ្ទិសបួងសួងឱ្យវិញ្ញាណក្ខន្ធ សម្តេច ឧត្តមទេពញាណ ហ៊ុន ណេង បានទៅកាន់សុគតិភពកុំបីឃ្លៀងឃ្លាត៕
