ប្រជាកសិករម្នាក់បានប្រទះឃើញគ្រាប់កាំភ្លើង ជាច្រើនគ្រាប់ សល់ពីសម័យសង្គ្រាម ក្នុងភូមិសាស្ត្រ ស្រុករុក្ខគីរី

ខេត្តបាត់ដំបង៖ ប្រជាកសិករម្នាក់បានប្រទះឃើញគ្រាប់យុទ្ធភ័ណ្ឌមិនទាន់ផ្ទុះ បានបង្កការភ្ញាក់ផ្អើលកាលពីថ្ងៃទី២៥ ខែឧសភា ឆ្នាំ២០២២ ត្រង់ចំណុចភូមិស្វាយយ៉ ក្នុងឃុំមុខរាហ៍ ស្រុករុក្ខគិរី ខេត្តបាត់ដំបង។

ប្រជាពលរដ្ឋ ដែលមានឈ្មោះ យោល យ៉ម អាយុ៥៩ឆ្នាំ ជាកសិករ រស់នៅក្បែរទីតាំងកើតហេតុ ដែលបាន​ប្រទះឃើញគ្រាប់ជាច្រើនគ្រាប់នោះ បានអះអាងថា នៅព្រឹកថ្ងៃកើតហេតុ គាត់បានចុះទៅដីចម្ការ របស់លោក ហើយកាប់គាស់រានដី បម្រុងដាំដំឡូងមី ភ្លាមៗនោះ បានប្រទះគ្រាប់កាំភ្លើង និងកេសគ្រាប់ ជាច្រើនជាបន្តបន្ទាប់ ហើយក៏បានរត់ទៅរាយការណ៍ ដល់សមត្ថកិច្ចមូលដ្ឋាន និងមន្ត្រីជំនាញ ដើម្បីប្រមូលទុកដាក់ នៅកន្លែងមានសុវត្ថិភាព រង់ចាំកម្ទេចចោល។

គ្រាប់មិនទាន់ផ្ទុះទាំងអស់ខាងលើ រួមមាន គ្រាប់ប្រភេទ ៦០មីលីម៉ែត្រ ចំនួន ១៨គ្រាប់ ផលិតនៅប្រទេសចិន ក្បាលគ្រាប់ចំនួន ១៧គ្រាប់ និងគីបបំបែក ចំនួន ៩គ្រាប់ ៕ អរគុណសន្តិភាព