សមត្ថកិច្ចបានចាប់ខ្លួនកញ្ញា សេង ធារី បន្ទាប់ពីតុលាការបានចេញសាលក្រមផ្តន្ទាទោសរយៈពេល ៦ឆ្នាំ ពីបទរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍

ភ្នំពេញ៖ សមត្ថកិច្ចបានចាប់ខ្លួន សេង ធារី បន្ទាប់ពីតុលាការបានចេញសាលក្រមផ្តន្ទាទោសរយៈពេល ៦ឆ្នាំ ពីបទរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទ​ឧក្រិដ្ឋជាអាទិ៍ ជាមួយមេក្លោងឧទ្ទាមក្រៅច្បាប់ សម រង្ស៊ី រួមទាំងបក្ខពួក។ ការឃាត់ខ្លួននេះ បានធ្វើឡើងនៅមុខសាលាដំបូងរាជធានីភ្នំពេញ នាព្រឹកថ្ងៃទី១៤ ខែមិថុនា ឆ្នាំ២០២២។

សាលាដំបូងរាជធានីភ្នំពេញបានប្រកាសសាលក្រមលើសំណុំរឿងរួមគំនិតក្បត់ ដោយផ្តន្ទាទោស សម រង្ស៊ី , អេង ឆៃអ៊ាង , ហូរ វ៉ាន់ , តុ វ៉ាន់ច័ន្ទ , អ៊ីហ្សា ឧស្មាន់ , គង់ សុភា , ម៉ោញ សារ៉ាត់ , អ៊ូ ច័ន្ទឫទ្ធិ , ឡុង រី , ម៉ែន សុថាវរិន្ទ្រ , អ៊ុ សំអាន ដាក់ពន្ធនាគាររយៈពេល ៨ឆ្នាំ ពីបទរួមគំនិតក្បត់ និងបង្គាប់ឲ្យចាប់ខ្លួនភ្លាម។

ចំណែកឈ្មោះ ហេង ចាន់រិទ្ធិ , លោក ទុំ វ៉ាន់ថន , កាក់ កុម្ភារ (នៅក្នុងពន្ធនាគារ) ផ្តន្ទាទោសរយៈពេល ៦ឆ្នាំ ដោយបន្តឃុំខ្លួនដាក់ពន្ធនាគារជាបន្តទៀត។

រីឯឈ្មោះ សេង ច័ន្ទធារី (សេង ធារី) , ហេង ដារ៉ូ , ឃិត ជំរឿន , តោ និមល និងបក្ខពួកមួយចំនួនទៀត​ផ្តន្ទាទោស ៦ឆ្នាំ និងបង្គាប់ឲ្យសមត្ថកិច្ចចាប់ខ្លួនភ្លាម ហើយមនុស្សមួយចំនួនទៀតផ្តន្ទាទោស ៥ឆ្នាំ ប៉ុន្តែអនុវត្តទោសព្យួរ ៕ អរគុណសន្តិភាព