ឯកឧត្តមឧបនាយករដ្ឋមន្ត្រី សាយ សំអាល់ ជំរុញការទប់ស្កាត់លើការបំភ្លៃព័ត៌មាន ពាក់ព័ន្ធនឹងការអភិវឌ្ឍក្រុងរុនតាឯកតេជោសែន និងតំបន់ពាក់ស្នែង
«យើងត្រូវរួមគ្នាទប់ស្កាត់លើការបំភ្លៃព័ត៌មាន ពាក់ព័ន្ធនឹងការអភិវឌ្ឍក្រុងរុនតាឯកតេជោសែន និងតំបន់ពាក់ស្នែង នៅខេត្តសៀមរាប ស្របទៅតាមទិសដៅរបស់រាជរដ្ឋាភិបាលកម្ពុជា»។
នេះជាប្រសាសន៍ ឯកឧត្តម សាយ សំអាល់ ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការអន្ដរក្រសួង ដើម្បីរៀបចំ និងអភិវឌ្ឍទីប្រជុំជនរុនតាឯក និងទីប្រជុំជនពាក់ស្នែង ក្នុងឱកាសដឹកនាំកិច្ចប្រជុំដើម្បីពិនិត្យវឌ្ឍនភាពនៃការអភិវឌ្ឍនានាដែលកំពុងដំណើរការនៅទីប្រជុំជនរុនតាឯក និងទីប្រជុំជនពាក់ស្នែង នៅថ្ងៃទី១១ ខែឧសភា ឆ្នាំ២០២៤ នៅទីស្តីការក្រសួងរៀបចំដែនដី។
កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្តម លោកជំទាវ រដ្ឋមន្ដ្រី រដ្ឋលេខាធិការ អនុរដ្ឋលេខាធិការ តំណាងក្រសួងពាក់ព័ន្ធ អភិបាលខេត្ត ក្រុង និងអាជ្ញាធរជំនាញពាក់ព័ន្ធ ដែលជាសមាសភាពគណៈកម្មការអន្ដរក្រសួងផងដែរ។
ឯកឧត្តម ឧបនាយករដ្ឋមន្ត្រី បន្ថែមថា គោលបំណងនៃកិច្ចប្រជុំនេះ ក៏ដើម្បីពិនិត្យវឌ្ឍនភាពការអភិវឌ្ឍក្រុងរុនតាឯកតេជោសែន និងតំបន់ពាក់ស្នែង ឱ្យក្លាយជាក្រុងសុខដុម និងពិភាក្សាលើបញ្ហា ដូចជា ការដោះស្រាយបញ្ហាការងារប្រជាពលរដ្ឋ ការផ្ដល់បណ្ណសមធម៌ ការទទួលរងហានិភ័យដោយគ្រោះធម្មជាតិ និងបញ្ហាសន្តិសុខក្នុងក្រុងជាដើម។
បន្ថែមពីលើនេះ ឯកឧត្តម សាយ សំអាល់ បានស្នើឱ្យអង្គប្រជុំពិភាក្សាគ្នា ដោយកំណត់ឱ្យច្បាស់លាស់ចំពោះការរៀបចំក្រុងប្រកបដោយហេដ្ឋារចនាសម្ព័ន្ធគ្រប់បែបយ៉ាងស្របតាមគោលនយោបាយយុទ្ធសាស្ត្ររបស់រាជរដ្ឋាភិបាល ដើម្បីឱ្យប្រជាពលរដ្ឋដែលបានស័្មគ្រចិត្តផ្លាស់ប្ដូរទីលំនៅមករស់នៅទីតាំងថ្មីនេះងាយស្រួលរស់នៅ។
ជាមួយគ្នានេះ ឯកឧត្តម បានណែនាំអាជ្ញាធរមូលដ្ឋានភូមិឃុំ ត្រូវរៀបចំផែនទីបែងចែកព្រំប្រទល់កំណត់តំបន់នីមួយៗឱ្យបានច្បាស់លាស់ ចំណែកគណៈកម្មាធិការដីសម្បទានសង្គមកិច្ចត្រូវសម្រួចមុខងារ តួនាទីភារកិច្ចរបស់ខ្លួនបន្ថែមទៀត ហើយក្រុមការងារត្រូវគិតគូរទាំងបច្ចេកទេស នយោបាយ និងថវិកា ដើម្បីជំរុញពន្លឿនការងារចុះបញ្ជីដីធ្លីឱ្យបានចប់សព្វគ្រប់នាពេលឆាប់ៗខាងមុខនេះសំដៅបញ្ចប់វិវាទនានាផងដែរ៕ អរគុណសន្តិភាព
