គ្រោះថ្នាក់ចរាចរណ៍មួយ រវាងរថយន្តដឹកខ្សាច់ បុករថយន្តទំនើប០១គ្រឿង បណ្តាលឲ្យខ្ទាតទៅបុកនឹងបង្គោលភ្លើង

ខេត្តស្វាយរៀង ៖  នៅ ថ្ងៃទី១៧ ខែឧសភា ឆ្នាំ២០២៤ នៅលើកំណាត់ផ្លូវជាតិលេខ១ ត្រង់ចំណុចភូមិតាប៉ ឃុំតាសួស ស្រុកស្វាយជ្រំ ។មុនពេលកើតហេតុ គេឃើញរថយន្តម៉ាកអាល់ហ្វាត ពណ៌ស ពាក់ស្លាកលេខ ភ្នំពេញ 2BX-6247 បើកបរពីទឹសខាងលិច ទៅកើត ខណៈនោះ ស្រាប់តែមានរថយន្តដឹកខ្សាច់ ១គ្រឿង បើកបរស្របទិសគ្នា យ៉ាងលឿន ហើយបើកវ៉ាជែង ក៏ជ្រុលចង្កូតទៅបុកជាមួយរថយន្តអាល់ហ្វាត ពីជំហៀង បណ្តាលឲ្យរថយន្តអាល់ហ្វាត រេចង្កូតទៅបុកបង្គោលភ្លើង នៅលើចិញ្ចើមថ្នលពេញទំហឹង បណ្តាលឲ្យខូចបែកខាងមុខខ្ទេចយ៉ាងដំណំ ។

សមត្ថកិច្ចបានឲ្យដឹងបន្តថា ចំណែករថយន្តបែនដឹកខ្សាច់ រេចង្កូតទៅបុកជាមួយរថយន្តដឹកទឹកសុទ្ធ ០១គ្រឿងទៀត បណ្តាលឲ្យខូចខាតយ៉ាងដំណំដែរ ទើបទៅមុខលែងរួច ។

សមត្ថកិច្ចបានមកធ្វើការវាស់វែងរួច បានស្ទូចរថយន្តបង្ក រថយន្តអាល់ហ្វាត និងរថយន្តដឹកទឹកសុទ្ធ យកទៅរក្សាទុកនៅអធិការដ្ឋាននគបាលស្រុកស្វាយជ្រំ ដើម្បីធ្វើការដោះស្រាយតាមក្រោយ ។ ចំណែកអ្នកបើកបររថយន្តអាល់ហ្វាត រងរបួសស្រាល ត្រូវបញ្ជូនទៅមន្ទីរពេទ្យបង្អែកស្រុកស្វាយជ្រំ ដើម្បីព្យាបាល ។ មូលហេតុរថយន្តបែនដឹកខ្សាច់ បើកបរក្នុងល្បឿនលឿន ហើយបើកវ៉ាជែង ក្នុងចំណុចគ្រោះថ្នាក់ ៕